MÁMS boıynsha konsýltatsııa 1 maýsymnan bastap 1414 arqyly beriledi
ALMATY. QazAqparat- Qazaqstandyqtar búginnen bastap medıtsınalyq saqtandyrý jáne medqyzmetke qatysty konsýltatsııalardy 1414 biryńǵaı baılanys ortalyǵy arqyly ala alady.
Buǵan deıin bul qyzmetti Medıtsınalyq saqtandyrý qory janyndaǵy 1406 baılanys ortalyǵy atqaryp kelgen bolatyn, dep habarlaıdy QazAqparat tilshisi.
MÁMS Almaty qalalyq fılıalynyń dırektory Tileýhan Ábildaevtyń aıtýynsha, bul shara halyqqa qyzmet kórsetý aıasyn keńeıtip, operator azdyǵynan jaýap berilmeı qalǵan qońyraýlar sanyn qysqartý maqsatynda qolǵa alynyp otyr.
«Buǵan deıin turǵyndar 1406 nómirine habarlasyp, medıtsınalyq saqtandyrý, densaýlyq saqtaýǵa qatysty tegin konsýltatsııa ala alatyn. Sonymen qatar, medıtsınalyq kómek sapasyna qatysty ótinish-shaǵymdar da osy baılanys arnasy arqyly qabyldanyp keldi. 1-maýsymnan bastap bul qyzmetti 1414 baılanys ortalyǵy kórsete bastaıdy», - dedi Tileýhan Ábildaev.
Fılıal dırektorynyń sózinshe, ondaǵy operatorlar shtaty úlken jáne ortalyqtyń tehnıkalyq múmkindikteri joǵary. Ortalyqtyń bir ýaqytta kóptegen qońyraýlardy qabyldaýǵa múmkindigi bar. Bul óz kezeginde abonentterdiń operator jaýabyn kútýge ketetin ýaqytyn birneshe mınýttan bir mınýtqa deıin qysqartýǵa múmkindik beredi.
Ótinishterdi burynǵysha Qordyń Qoldau 24/7 mobıldi qosymshasy, Telegram-bot (@SaqtandyrýBot) pen resmı veb-saıty arqyly da joldaýǵa bolady.
Bir aıta keterligi, 1414 operatorlary kún saıyn saǵat 9.00-den 20.00-ge deıin jumys isteıdi.
