MÁMS boıynsha Call ortalyq jumys isteı bastady

NUR-SULTAN. QazAqparat- Mindetti áleýmettik medıtsınalyq saqtandyrý boıynsha Call ortalyqqa tegin habarlasýǵa bolady.

Bul týraly Ortalyq kommýnıkatsııalar qyzmetinde ótken brıfıngte «Áleýmettik medıtsınalyq saqtandyrý qory» kommertsııalyq emes AQ basqarma tóraǵasy Aıbatyr Jumaǵulov aıtty, dep habarlaıdy QazAqparat tilshisi.

Mindetti áleýmettik medıtsınalyq saqtandyrý qorynyń jumysyna qatysty suraqtardyń jaýabyn 1406 nómirine habarlasý arqyly alýǵa bolady.

«Ózderińiz biletindeı, MÁMS - Qazaqstanda alǵash engizilip jatqan iri medıtsınalyq jobalardyń biri. Sol sebepti halyq tarapynan qoıylyp jatqan suraq kóp. Osy oraıda jumysty júıelendirý úshin jyl basynan bastap 1406 nómirli Call ortalyq óz jumysyn bastady», - deıdi Aıbatyr Jumaǵulov.

Onyń aıtýynsha, ortalyqtyń maqsaty – azamattardy jıi mazalaıtyn suraqtarǵa jaýap berý arqyly patsıentterdiń múddesin qorǵaý.

«Ortalyqqa MÁMS-ke qatysty barlyq suraqtar boıynsha habarlasýǵa bolady. Ol 24/7 saǵat boıy jumys isteıdi. Bul qor jumysynyń ashyqtyǵy men qoljetimdiligin qamtamasyz etý úshin jasalǵan dúnıe. Biz kelip túsken suraqtardy jeke-jeke qarastyramyz. Eger belgili bir medıtsınalyq mekemege qatysty shaǵymdar jıi tússe, qajet jaǵdaıda ol mekememen jumys toqtatylatyn bolady», - dedi ol.

Sondaı-aq, basqarma tóraǵasy 1406 nómirli Call ortalyǵyna azamattar kóbinese aqyl-keńes alý maqsatynda habarlasatyndyǵyn aıtty. Qazaqstan boıynsha qońyraý shalý - tegin.

Eske sala ketsek, buǵan deıin MÁMS qorynyń basshysy bıyl atalǵan júıe jumysyna bıýdjetten 1,6 trln teńge bólinetinin aıtqan bolatyn.

Sonymen qatar, Aıbatyr Jumaǵulov MÁMS júıesinde saqtandyrylý mártebesin qalaı bilýge bolatyny týraly aıtyp ótti.