MÁMS boıynsha jeke klınıkalarda qandaı jaǵdaıda qaralýǵa bolady
ASTANA. KAZINFORM — Áleýmettik medıtsınalyq saqtandyrý qory jeke klınıkalarda MÁMS boıynsha medıtsınalyq qyzmetterdi alý múmkindigin túsindirdi.
Bul múmkindik áleýmettik medıtsınalyq saqtandyrý júıesin ázirleý kezinde bastapqydan qarastyrylǵan jáne búgingi kúnge deıin qoldanylyp keledi.
Ol qalaı jumys isteıdi?
Qyzmet kórsetetin emhana óz patsıentine MÁMS júıesinde jumys isteıtin kez kelgen klınıkaǵa joldama bere alady. Bul jaǵdaıda patsıent medıtsınalyq qyzmet úshin aqy tólemeıdi. Sebebi kórsetilgen qyzmetti qarjylandyrý qor tarapynan qosalqy oryndaý sharty aıasynda júrgiziledi.
Qaı kezde qoldanylýy múmkin?
Eger qyzmet kórsetetin emhanada belgili bir konsýltatsııany alýǵa qajetti profıldi dáriger bolmasa nemese belgili bir dıagnostıkalyq qyzmetti ótkizýge arnalǵan jabdyq jetispese, patsıentti basqa klınıkaǵa jiberedi. Mysaly, birqatar alǵashqy medıtsınalyq-sanıtarlyq kómek uıymdarynda tirkelgen halyq sany az bolǵandyqtan, keıbir tar beıindi dárigerler (mysaly, pýlmonolog, allergolog, angıohırýrg) bolmaýy múmkin nemese ÝDZ, rentgen apparattary joq. Osyndaı qyzmetter patsıentterge qajet bolǵan jaǵdaıda, olardy emhana qosalqy oryndaý týraly kelisimshart jasasqan klınıkaǵa jiberedi.
Sonymen qatar, emhanada qajetti mamandar men jabdyq bolǵanymen, jazylý bir aıǵa tolyp qalǵan jaǵdaılar da kezdesedi. Sondaı-aq qajet maman eńbek demalysynda bolsa nemese jabdyq ýaqytsha isten shyqsa osy mehanızm qoldanylady. Mundaı jaǵdaıda patsıent qajetti medıtsınalyq qyzmetti alý úshin basqa klınıkaǵa, onyń ishinde jeke klınıkaǵa joldama suraýǵa quqyly.
— Joldama tek Áleýmettik medıtsınalyq saqtandyrý qorynyń jetkizýshiler bazasynda tirkelgen jeke klınıkalarǵa ǵana beriledi, — delingen habarlamada.
Bul rette patsıenttiń emhanasy men atalǵan klınıka arasynda qosalqy oryndaý shartynyń bar-joǵy mańyzdy emes. Sebebi joldama jasalǵan kezde ol aqparattyq júıede avtomatty túrde qalyptastyrylady.
Jeke klınıkada patsıentter tek konsýltatsııa alyp nemese dıagnostıkalyq protsedýralardan ótip qana qoımaı, kúndizgi nemese táýliktik statsıonar jaǵdaıynda, onyń ishinde MÁMS sheńberine kiretin ártúrli operatsııalardy jasaý úshin de em qabyldaı alady.
Quqyqtardy qorǵaý
Eger patsıent qajetti medıtsınalyq qyzmetke joldama ala almasa, ol emhana janyndaǵy Patsıentterdi qoldaý jáne ishki saraptama qyzmetine júgine alady. Oń sheshim bolmaǵan jaǵdaıda, bul fakti boıynsha tekserý júrgizý úshin qorǵa resmı ótinish joldaýǵa bolady.
Qor atap ótkendeı, kez kelgen konsýltatsııalyq-dıagnostıkalyq qyzmetti patsıentke emdeýshi dáriger taǵaıyndaıdy. Ol patsıenttiń jaǵdaıyn zerttep, shaǵymdary men baıqalatyn belgilerin baǵalaıdy. Tek tıisti kórsetilimder bolǵan kezde ǵana zerthanalyq jáne aspaptyq zertteýlerge nemese profıldi mamannyń konsýltatsııasyna joldama beredi.
Aıta ketelik mınıstrlik MÁMS shyǵyny boıynsha derekterdi jarııalaýdy qarastyryp otyr.