MÁMS boıynsha medıtsınalyq qyzmet jekemenshik klınıkalarda da qoljetimdi: ony qalaı alýǵa bolady

ASTANA. KAZINFORM – Mindetti áleýmettik medıtsınalyq saqtandyrý (MÁMS) júıesi aıasynda astanalyq turǵyndar medıtsınalyq kómekti tek memlekettik emes, sondaı-aq jekemenshik klınıkalardan da ala alady. Bul múmkindik MÁMS engizilgen sátten bastap kózdelgen, dep jazdy Astana qalasy ákimdiginiń resmı saıty.

Qordyń málimetinshe, tirkelgen emhana patsıentke MÁMS aıasynda qyzmet kórsetetin kez kelgen klınıkaǵa joldama bere alady. Bul jaǵdaıda patsıent medıtsınalyq qyzmet úshin aqy tólemeıdi, sebebi qarjylandyrý áleýmettik medıtsınalyq saqtandyrý qory esebinen júrgiziledi.

Eger tirkelgen emhanada qajetti beıindi maman bolmasa nemese dıagnostıka úshin tıisti jabdyq jetispese, patsıent basqa klınıkaǵa joldanady. Mysaly, keıbir ýchaskelik emhanalarda tirkelgen turǵyndar sanynyń azdyǵyna baılanysty aıasy tar beıindi dárigerler bolmaıdy nemese ÝDZ ne rentgen apparaty joq. Mundaı jaǵdaıda patsıentter olarmen kelisim boıynsha jumys isteıtin klınıkalarǵa jiberiledi.

Sonymen qatar emhanada maman nemese jabdyq bolǵanymen, jazylý birneshe aıǵa tolyp ketken jaǵdaıda da osy tetik qoldanylady. Dáriger eńbek demalysyna shyqqan nemese apparat ýaqytsha isten shyqqan kezde de patsıent basqa klınıkaǵa, onyń ishinde jekemenshikke joldama suraı alady. Patsıentti tek qordyń jetkizýshiler bazasyna kiretin jekemenshik klınıkaǵa ǵana joldaýǵa bolady. Tirkelgen emhananyń bul klınıkamen aldyn ala birlesip oryndaýshylyq kelisiminiń bolýy mindetti emes, joldama berilgen sátte aqparattyq júıede kelisim avtomatty túrde jasalady.

Jekemenshik klınıkalarda patsıentter konsýltatıvtik jáne dıagnostıkalyq qyzmettermen qatar, kúndizgi nemese táýlik boıy statsıonarlarda em alýyna, sondaı-aq MÁMS paketine kiretin operatsııalardy jasaýyna múmkindik bar.

Mundaı jaǵdaıda ol óziniń emhanasyndaǵy naýqastardy qoldaý jáne ishki saraptama qyzmetine shaǵymdana alady. Oń sheshim bolmaǵan jaǵdaıda qorǵa resmı ótinish joldap, tekseris júrgizýdi suraý quqyǵy bar.

Qordyń málimetinshe, kez kelgen konsýltatıvtik nemese dıagnostıkalyq qyzmetti naýqasqa tek emdeýshi dáriger taǵaıyndaıdy. Ol patsıenttiń jaǵdaıyn baǵalap, shaǵymdary men sımptomdaryn zerttegennen keıin ǵana tıisti kórsetkishter bolǵanda joldama beredi.

Eske sala keteıik, MÁMS boıynsha qyzmet alý úshin azamat saqtandyrylǵan bolýy tıis.

Buǵan deıin mınıstr Aqmaral Álnazarova MÁMS júıesiniń basty nátıjelerin ataǵan edi.

2026 jyly MÁMS derekterin beretin memlekettik organdardyń tizimi jańartylady.