MÁMS: BQO-da 106 myńnan astam adam saqtandyrý júıesinen tys qalyp otyr

ORAL. KAZINFORM — QR Ulttyq statıstıka bıýrosynyń derekterine sáıkes Batys Qazaqstan oblysynda 695 588 adam tursa, sonyń 589 052-si nemese 84,7 paıyzy MÁMS júıesinde saqtandyrylǵan.

«Áleýmettik medıtsınalyq saqtandyrý qory» KEAQ BQO boıynsha fılıalynyń dırektory Sandýǵash Bolysbekovanyń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde 384 944 azamat mindetti áleýmettik medıtsınalyq saqtandyrýǵa jarnalardy memleket tóleıtin 15 jeńildik sanatyna kiredi. 

Sandýǵash Qııasbaıqyzynyń sózine qaraǵanda, qalǵan 210 780-y — qyzmetkerler, jumys berýshiler, ózin-ózi jumyspen qamtyǵandar jáne basqa da ekonomıkalyq belsendi azamattar.

— Degenmen saqtandyrylmaǵandar da bar. Olardyń úlesi — 15,3 paıyz. Dálirek aıtqanda, 106 536 adam túrli sebeptermen júıeden tys qalyp otyr. MÁMS júıesinde saqtandyrý mártebesi bolmasa da, olardyń bári kepildendirilgen medıtsınalyq kómek ala alady. Biraq MÁMS júıesinde saqtandyrylmaýy azamattardyń aýrýlardyń aldyn alyp, josparly jáne joǵary tehnologııalyq medıtsınalyq kómek pen dıagnostıkaǵa qol jetkizýin qıyndatady, — deıdi S. Bolysbekova.

Onyń aıtýynsha, buǵan deıin saqtandyrý mártebesinen aıyrylǵan derbes tóleýshiler ony qalpyna keltirý úshin ótkizip alǵan aılar men tipti jylǵa da jarnalardy tóleýi tıis edi. Qazirgi kezde balama ádis paıda boldy. Jarna aýdarylmaǵan ótken kezeńdi tólemeı-aq, aldaǵy 12 aı úshin tólem jasasa, jetip jatyr.

Fılıal dırektory keltirgen málimetke qaraǵanda, ótken jyly 56 medıtsınalyq uıymmen kelisimshart jasalsa, sonyń 37-si nemese 66,1 paıyzy — memlekettik, 19-y (33,9 paıyzy) — jeke mekemeler. Qarjylandyrý kólemi 2023 jylmen salystyrǵanda, 9 paıyzǵa artyp, 84,9 mlrd teńgege jetti.

Eske sala keteıik, budan buryn Batys Qazaqstanda 130 myńǵa jýyq adamnyń saqtandyrylmaǵanyn jazǵan bolatynbyz.