MÁMS: Batys Qazaqstanda 130 myńǵa jýyq adam saqtandyrylmaǵan
ORAL. KAZINFORM – 2017 jyly 1 shildede mindetti áleýmettik medıtsınalyq saqtandyrý júıesi engizilgennen bastap bıylǵy qyrkúıekke deıin BQO turǵyndarynan 88,6 mlrd astam qarjy túsken.
"Áleýmettik medıtsınalyq saqtandyrý qory" kommertsııalyq emes aktsıonerlik qoǵamynyń Batys Qazaqstan oblysy boıynsha fılıalynyń dırektory Sandýǵash Bolysbekovanyń óńirlik kommýnıkatsııalar qyzmeti alańynda ótken brıfıngte málimet etkenindeı, saqtandyrý mártebesi bar adamdar MÁMS aıasynda keńeıtilgen medıtsınalyq qyzmetterge qol jetkize alady. Ol úshin únemi jarnalar men aýdarymdardy tóleý qajet.
Onyń sózine qaraǵanda, bıylǵy qańtardan qyrkúıekke deıin oblys turǵyndarynan túsken jalpy qarajat kólemi 18,8 mlrd teńgeden asqan. Túsimderdiń negizgi bóligi, ıaǵnı 10,2 mlrd teńgeden astamy jumys berýshilerden aýdarylsa, qalǵan 8,6 mlrd teńge –jumyskerlerdiń, jeke kásipkerlerdiń, derbes tóleýshilerdiń jáne azamattyq-quqyqtyq sıpattaǵy sharttar boıynsha jumys isteıtin tulǵalardyń jarnalary.
«Bıylǵy 1 qazandaǵy málimet boıynsha Batys Qazaqstan oblysynda 696 886 adam tirkelgen. Saqtandyrý bazasynyń derekterine sáıkes, óńirde 565 341 adam nemese 81,3 paıyzy saqtandyrylǵan. Bulardyń 390 myńy — MÁMS-ke jarnalardy memleket tóleıtin 15 jeńildikti sanatqa jatatyn azamattar. Qalǵan 175 341-i — jumyskerler, jumys berýshiler, ózin-ózi jumyspen qamtyǵandar jáne ekonomıkalyq belsendi basqa azamattar. Sonymen qatar 129 957 adam saqtandyrylmaǵan», - dedi S.Bolysbekova.
Fılıal dırektorynyń aıtýynsha, bıyl 56 medıtsınalyq uıymmen kelisim-shart jasalsa, sonyń 37-si (66,1 paıyzy) – memlekettik, 17-si (33,9 paıyzy) – jeke uıymdar. 2023 jylmen salystyrǵanda, qarjylandyrý kólemi 6 paıyzǵa artyp, bıyl 82,8 mlrd teńgege jetken.
«Fılıal 50 medıtsınalyq uıymǵa 25,5 mlrd teńge (30,7 paıyz) kóleminde aldyn ala avans berdi. Búgingi tańda medıtsınalyq uıymdardy shyn máninde kórsetilgen medıtsınalyq qyzmetter úshin qarjylandyrý boıynsha jumys júrgizilýde, tólem tapsyrmalary tamyz kezeńi boıynsha rásimdelýde. Toǵyz aıda 58,2 mlrd teńge nemese jasalǵan kelisimsharttardyń somasynan 70,3 paıyzy tólendi», - dedi S.Bolysbekova.
Onyń málimdeýinshe, qor fılıalynda 1 585 ótinish tirkelse, sonyń 712-si (ótken jyldyń toǵyz aıynda – 679) – shaǵymdar. 271 shaǵym medıtsınalyq uıymdarmen azamattardyń máselelerin sheshý barysynda keri qaıtaryldy. Tek 46 shaǵym jospardan tys monıtorıngke jiberildi. Halyqtyń shaǵymdarynyń eń kóp sany alǵashqy medıtsınalyq-sanıtarlyq kómek kórsetý uıymdaryna qatysty.
«Shaǵymdar men ótinishterdi taldaý barysynda alǵashqy medıtsınalyq-sanıtarlyq kómek deńgeıinde kórsetiletin medıtsınalyq qyzmetterdiń sapasyna qatysty birqatar problemalyq máseleler anyqtaldy. Sondaı-aq túıtkildi jaıttar jyldyń basynda alǵashqy medıtsınalyq-sanıtarlyq kómek uıymdarynyń ambýlatorlyq dári-dármekpen ýaqytyly qamtamasyz etilmeýi, medıtsınalyq kómektiń qoljetimdiligi jáne konsýltatıvti-dıagnostıkalyq qyzmetterdi uzaq kútý, keı jaǵdaılarda kadr tapshylyǵymen baılanysty boldy», - dedi S.Bolysbekova.
