MÁMS aıasynda medıtsınalyq kómekti aqyly negizde kórsetkender jaýapqa tartylady

NUR-SULTAN. QazAqparat - Qazaqstanda mindetti áleýmettik medıtsınalyq saqtandyrý aıasynda kórsetiletin medıtsınalyq kómekti aqyly negizde bergeni úshin ákimshilik jaýapkershilik kózdeledi. Bul týraly QR Parlamenti Senatynyń jalpy otyrysynda QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

Densaýlyq saqtaý mınıstri «Halyq densaýlyǵy jáne densaýlyq saqtaý júıesi týraly» kodeks pen «Keıbir zańnamalyq aktilerge densaýlyq saqtaý máseleleri boıynsha túzetýler engizý jóninde» ilespe zań jobasyn tanystyrdy.

«Qoǵamdyq densaýlyq saqtaýdyń deńgeıin kóterýde memlekettiń, jumys berýshiler men azamattardyń ortaq jaýapkershiligin qamtamasyz etý maqsatynda kodeks jobasynda Aıkos, GLO, qorqor sekildi temekiniń jańa túrlerin tutynýdy shekteý, sondaı-aq snıýster men basqa da shegilmeıtin temeki buıymdaryn ákelýge, óndirýge jáne taratýǵa tyıym salý, 21 jasqa tolmaǵan adamdarǵa temeki ónimderin satqany úshin ákimshilik jaýapkershilikti engizý kózdeledi. Vaktsınalardyń adam densaýlyǵyna áserin retteý maqsatynda adam densaýlyǵyna jeńil zııan keltirýge ákep soqqan vaktsınalardy ákelý, satyp alý, tasylmaldaý, saqtaý erejelerin buzǵany úshin, vaktsınalardyń sapasy men qaýipsizdigine saraptama jasaý tártibin buzǵany úshin ákimshilik jaýapkershilik engizý qarastyrylady. Sonymen qatar qyzmetkerlerdiń densaýlyǵyn nyǵaıtý jáne aýrýlardyń aldyn alý, medıtsınalyq qarap-tekserýler men skrınıng ótkizý maqsatynda áleýmettik demalystar berý kózdelgen», - dedi Eljan Birtanov.

Osy oraıda ol medıtsınalyq kómek kórsetýdi uıymdastyrý máselesine toqtaldy. Medıtsınalyq kómektiń qaýipsizdigin qamtamasyz etý maqsatynda medıtsınalyq kómek kórsetýdiń standartyn ázerleýde biryńǵaı tásil qoldanylatyndyǵyn, medıtsınalyq qyzmetpen aınalysý lıtsenzııasy ortalyq deńgeıde beriletindigin atap ótti.

«Aýyldyq jerlerde kóshpeli medıtsınalyq keshenderdiń, medıtsınalyq poıyzdar men qashyqtan medıtsınalyq kómek kórsetý quraldarynyń qoljetimdiligi artady. Tegin medıtsınalyq kómektiń kólemi jáne mindetti áleýmettik medıtsınalyq saqtandyrý asynda kórsetiletin medıtsınalyq kómekti aqyly negizde bergeni úshin ákimshilik jaýapkershilik kózdeledi», - dedi Eljan Birtanov.

Sondaı-aq mınıstr densaýlyq saqtaý salasyndaǵy bilim berý jáne ǵylym baǵytynda Dúnıejúzilik medıtsınalyq bilim berý federatsııasynyń talaptaryna sáıkes bilim alýshylardy jáne túlekterdiń kásiptik daıarlyǵyn táýelsiz baǵalaý; ýnıversıtet aýrýhanalaryn qurý sharttary men qyzmetiniń qaǵıdattaryn odan ári damytý josparlanǵanyn aıtty.

«Kodeks jobasy etıka máseleleri jónindegi komıssııalardyń róli men mártebesin retteıdi», - dedi ol.