MÁMS aıasynda bosanatyn áıelder qalaǵan perzenthanany tańdaı alady
Qazaqstan 2018 jyldyń 1 qańtarynan bastap mindetti áleýmettik saqtandyrý júıesin engizbek.
Almaty qalalyq №8 emhanasynyń bas dárigeri Farıda Aǵybaevanyń aıtýynsha, MÁMS boıynsha kez kelgen júkti áıel jumys istese de istemese de medıtsınalyq kómektiń kepildirilgen kólemi boıynsha tegin bosandyrylady.
«Jumys istemegen júkti áıelder, 3 jasqa deıin bala qarap otyrǵan áıelder áleýmettik turǵydan az qamtylǵan azamattarǵa jatady. Sol sebepti olar úshin saqtandyrý qoryna 2018 jyldyń qańtarynan memleket tóleıdi. Al 2017 jyldyń 1 shildesinen bastap jumysshylar úshin jumys berýshi tóleıdi», - dedi Farıda Aǵybaeva.
Eger, áıel adamǵa shuǵyl kómek kerek bolsa kez kelgen jerde tegin qyzmet kórsetiletin bolady.
Alaıda, júkti áıelderge turǵylyqty jerine tirkelý shart deıdi maman.
«Júkti áıelder emhanaǵa kelip ózderi qalaǵan jalpy tájirıbeli dárigerdi tańdaı alady. Olar áıeldiń densaýlyǵyn baqylap, bosanýǵa daıyndyqqa úıretedi. Sonymen qatar, olarǵa qaýipti belgiler týraly aqparat berip, ana bolýǵa daıyndaıdy», - dedi ol.
Bir aıta keterligi, júkti kelinshekter kez kelgen bosandyrý mekemesin tańdaı alady.
«Áıelder kez kelgen, tipti aqyly perzenthanany tańdaı alady. Tek bul perzenthananyń Áleýmettik medıtsınalyq saqtandyrý qorymen kelisim sharty bolýy tıis. ıAǵnı, aqsha patsıenttiń artynan keledi. Bul óz kezeginde aýdandyq, shalǵaı jerlerdegi perzenthanalardyń básekege qabilettiligin arttyrady dep oılaımyn», - dedi F.Aǵybaeva.
Bosanatyn áıel eshqandaı aqsha berýge tıis emes, taldaýlar, dári-dármek, emdeý sharalary, tamaq barlyǵy MÁMS paketine kiredi.
Qazaqstanda 2017 jyldyń 1 shildesinen bastap mindetti medıtsınalyq saqtandyrý júıesi engizildi.
«Mindetti áleýmettik medıtsınalyq saqtandyrý týraly» Zańnyń 28-babynyń 4-tarmaǵyna sáıkes myna azamattar qorǵa jarnalar tóleýden bosatylady:
1) balalar;
2) «Altyn alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, sondaı-aq І jáne ІІ dárejeli «Ana dańqy» ordenderimen nagradtalǵan kóp balaly analar;
3) Uly Otan soǵysyna qatysýshylar men onyń múgedekteri;
4) múgedekter;
5) jumyssyz retinde tirkelgen adamdar;
6) ınternat uıymdarynda bilim alyp jáne tárbıelenip jatqan adamdar;
7) orta, tehnıkalyq jáne kásiptik, orta bilimnen keıingi, joǵary bilim berý, sondaı-aq rezıdentýra nysanyndaǵy joǵary oqý ornynan keıingi bilim berý uıymdarynda kúndizgi oqý nysanynda bilim alyp jatqan adamdar;
8) bala (balalardy) týýǵa, jańa týǵan balany (balalardy) asyrap alýǵa baılanysty, bala (balalar) úsh jasqa tolǵanǵa deıin onyń (olardyń) kútimine baılanysty demalysta júrgen adamdar;
9) jumys istemeıtin júkti áıelder, sondaı-aq bala (balalar) úsh jasqa tolǵanǵa deıin ony (olardy) is júzinde tárbıelep otyrǵan jumys istemeıtin adamdar;
10) zeınetkerler;
11) áskerı qyzmetshiler;
12) arnaýly memlekettik organdardyń qyzmetkerleri;
13) quqyq qorǵaý organdarynyń qyzmetkerleri;
14) qylmystyq-atqarý (penıtentsıarlyq) júıesi mekemelerinde (qaýipsizdigi barynsha tómen mekemelerdi qospaǵanda) sot úkimi boıynsha jazasyn ótep júrgen adamdar;
15) ýaqytsha ustaý oqshaýlaǵyshyndaǵy jáne tergeý ızolıatorlaryndaǵy adamdar.
Bul rette memleket áskerı qyzmetshiler, arnaýly memlekettik organdardyń qyzmetkerleri, quqyq qorǵaý organdarynyń qyzmetkerleri úshin jarnalardy aýdarmaıdy: azamattardyń bul sanattary vedomstvolyq jeliniń mekemelerinde qyzmet kórsetýdi alýyn jalǵastyratyn bolady.
2018 jyldyń 1 qańtarynan bastap jarnalardy tóleýge ózin-ózi jumyspen qamtyǵan azamattar da qosylady, al memleket jarna tóleýden bosatylǵan halyqtyń 14 sanatyn, sonyń ishinde birinshi kezekte halyqtyń áleýmettik qorǵalmaǵan tobyn saqtandyratyn bolady.
