MÁMS aıasynda 865 myńnan astam stomatologııalyq qyzmet kórsetildi - ShQO

ÓSKEMEN. QazAqparat – Shyǵys Qazaqstan oblysynda MÁMS aıasynda 865 myńnan astam stomatologııalyq qyzmet kórsetildi, dep habarlaıdy QazAqparat tilshisi.

«Áleýmettik medıtsınalyq saqtandyrý qory» ShQO fılıaly baspasóz qyzmetiniń málimetine súıensek, óńir jurtshylyǵyna bir jylda MÁMS boıynsha 865 myńnan astam stomatologııalyq qyzmet kórsetilgen.

«Mindetti áleýmettik medıtsınalyq saqtandyrý júıesin iske qosý balalar men júkti áıelderge josparly stomatologııalyq kómek alýǵa múmkindik berdi. Al shuǵyl jaǵdaılarda zeınetkerler, kópbalaly analar, múgedekter, olarǵa kútim jasaıtyn jumyssyzdar, AÁK alýshylar, belgili bir aýrýlarmen esepte turǵan patsıentter qarala alady. Ótken jyly osy maqsatta 1,9 mlrd teńge jumyldyryldy», - dedi fılıal basshysy Ǵalymjan Ábilov.

Óz sózinde ol qorda stomatologııalyq kómek patsıenttiń medıtsınalyq uıymdy erkin tańdaýy negizinde kórsetiletinin, ıaǵnı ýchaskelik dárigerdiń joldamasy talap etilmeıtinin eske saldy.

Qyzmetterdi alý úshin qormen kelisimsharty bar jeke stomatologııany tańdaýǵa nemese óz emhanańyzdyń stomatologııalyq kabınetine júginýge bolady.