MÁMS aıasynda 1 jeńildik alýshyǵa jylyna 60000 teńge jumsalatyn bolady - Bahmýtova

Qazaqstanda mindetti áleýmettik medıtsınalyq saqtandyrý (MÁMS) júıesi jumys jasaı bastady.

Alǵashqy salymdar arnaıy qorǵa 25 tamyzdan keshikpeı túsetin bolady.

«Arnaıy medıtsınalyq saqtandyrý qorynyń» tóraǵasy Elena Bahmýtova jıyn barysynda zań normalaryna engiziletin ózgerister týraly aıtyp, memleket, jeke adamdar, jumys berýshiler qansha aqsha tóleıtindigin atap kórsetti.

«Jumys berýshilerge stavka 2 ese azaıtyldy, qazir bul kórsetkish jumysshynyń tabysynyń 1 paıyzy bolyp otyr. Bul soma jumys berýshi 1 shildeden bastap tólenetin bolady. Kezeń-kezeńimen bul stavka kóbeıe bastaıdy. 2022 jylǵa taman jumys berýshiler jumysshynyń tabysynyń 3 paıyzyn óz qarjysynan beretin bolady. Al memleket jeńildik alýy tıis sanattaǵy adamdarǵa 1 qańtardan bastap 3,75% paıyz tóleıdi. Bul kórsetkish te jyl ótken saıyn artyp, 2022 jylǵa taman 4-5% kóleminde bolady. Sońǵy eki jyldaǵy ortasha jalaqy kóleminen esepteledi», - dedi Elena Bahmýtova.

Sondaı-aq, jeke kásipkerliktiń de stavkalary ózgeredi. Burynǵy qoldanysta bolǵan zańǵa sáıkes, ol JK tabys mólsherine baılanysty bolsa, endi naqty belgilendi. Jeke kásipkerler jumyskerlerdiń eki aılyq jalaqysynan esepteıtin bolady.

Jumysshylardyń salymy 2019 jyldan bastap 1 % kóleminde tússe, 2020 jylǵa taman 2 % bolady. Bul jumysshynyń óz qarjysynan ustalatyn bolady.

«Aqshamen sanaǵanda 2017 jyly memleket jeńildik alatyn 14 sanattyń adamdaryna jylyna 60149 teńge, jumys berýshi 27379 teńge, jeke kásipkerlikter 31 941 teńge, belsendiligi tómen halyq 16970 teńge salyp turady. Jumysshylardyń jalaqysynan 2019 jyldan bastap ustalatyn bolady», - dedi E.Bahmýtova.

QR Densaýlyq saqtaý mınıstri Eljan Birtanovtyń aıtýynsha, qazirgi tańda memleket ár azamatqa jylyna 55000 teńge tólep otyr.

«Sondaı-aq, azamattar ózderi jylyna 35 000 teńge qosymsha medıtsınalyq qyzmetterge jumsaıdy», - dedi mınıstr.