MÁMS aıasynda 1,1 trln teńgege medıtsınalyq kómek kórsetildi

ASTANA. KAZINFORM — Byltyr MÁMS aıasynda 1,1 trln teńgege medıtsınalyq kómek kórsetildi. Kórsetkish 2023 jylmen salystyrǵanda 12%-ǵa joǵary, dep habarlaıdy Áleýmettik medıtsınalyq saqtandyrý qory.

Jalpy, byltyr TMKKK jáne MÁMS aıasynda medıtsınalyq kómek kórsetýge 2 trln 522 mlrd teńge bólindi.

Satyp alý jospary men qarjylandyrý

Áleýmettik medıtsınalyq saqtandyrý qory 2024 jyldyń qorytyndysyn jarııalady. Eki paket boıynsha medıtsınalyq kómekti qarjylandyrýǵa 2,8 trln teńge qarastyryldy, bul kórsetkish 2023 jylmen salystyrǵanda 8%-ǵa artqan.

— Qor bekitilgen satyp alý jospary aıasynda 1975 medıtsınalyq qyzmet kórsetýshimen 2,5 trln teńgeden astam somaǵa kelisimshart jasady. Olardyń basym bóligi — 1274-i (64,5%) jekemenshik klınıka. 2023 jyly bul kórsetkish 1260 bolǵan. Klınıkalar ambýlatorııalyq gemodıalız, konsýltatsııalyq-dıagnostıkalyq qyzmetter, statsıonardy almastyratyn jáne statsıonarlyq kómek, MSAK, joǵary tehnologııalyq medıtsınalyq qyzmetter, qalpyna keltirý jáne medıtsınalyq ońaltý sekildi negizgi medıtsınalyq kómek túrlerinde mańyzdy ról atqarady, — dedi ÁMSQ basqarma tóraǵasynyń orynbasary Svetlana Ponomareva.

MÁMS júıesin engizý nátıjesinde densaýlyq saqtaý salasynyń bıýdjetin jyl saıyn ulǵaıtýǵa múmkindik týdy. 2024 jyly jedel medıtsınalyq kómek men sanıtarlyq avıatsııany qarjylandyrý 16%-ǵa, statsıonarlyq kómek — 12%-ǵa, konsýltatsııalyq-dıagnostıkalyq kómek — 12%-ǵa, statsıonardy almastyratyn kómek — 11%-ǵa, ambýlatorııalyq gemodıalız — 10%-ǵa, aýyldyq jerdegi statsıonarlyq jáne statsıonardy almastyratyn mamandandyrylǵan kómek 10%-ǵa ósti.

MÁMS júıesimen qamtý jáne aýdarymdar

2024 jyly MÁMS júıesinde 15,9 mln adam saqtandyrylǵan. Azamattar men jumys berýshilerden aýdarylǵan jarnalar men tólemder somasy 1 trln 253 mlrd teńgeni qurady. Onyń ishinde jumys berýshiler 529,9 mlrd teńge aýdarsa, qyzmetkerler 346,7 mlrd teńge jarna tóledi. Memlekettiń jarnasy 289 mlrd teńge, al jeke kásipkerlerden túsken soma 57 mlrd teńgege teń. Azamattyq-quqyqtyq sharttar boıynsha tabys alatyn tulǵalardan 14,8 mlrd teńge, derbes tóleýshilerden 12 mlrd teńge jınaldy.

11,7 mln-nan astam saqtandyrylǵan azamat MÁMS aıasynda 1,1 trln teńgeden astam somaǵa teń medıtsınalyq kómek aldy. Bul rette bir adamnyń emhana nemese aýrýhanaǵa barǵan kezde birneshe qyzmet alatynyn eskerý qajet.

Qandaı qyzmetter kórsetildi?

Bastapqy medıtsınalyq-sanıtarlyq kómektiń úlesi aıtarlyqtaı joǵary — 578,48 mlrd teńgeni qurady. 774 myń jaǵdaı boıynsha statsıonardy almastyratyn jaǵdaılarda mamandandyrylǵan medıtsınalyq kómek 81,65 mlrd teńgege kórsetildi. Joǵary tehnologııalyq medıtsınalyq qyzmetterge 21,6 myńnan astam patsıent úshin 90,2 mlrd teńge tólendi.

Konsýltatsııalyq-dıagnostıkalyq qyzmetter sany 139 mln-ǵa jýyqtap, jalpy quny 350,62 mlrd teńge boldy. Onyń ishinde MÁMS aıasynda 30,58 mlrd teńgege 6,3 mln-nan astam jedel jáne josparly stomatologııalyq qyzmetter kórsetildi.

Medıtsınalyq ońaltý boıynsha 76,51 mlrd teńgege shamamen 9,4 mln qyzmet kórsetildi. Ótken jyly táýlik boıy jumys isteıtin statsıonarda 422,6 myńnan astam patsıent emdelip, oǵan 240 mlrd teńgeden astam qarajat jumsaldy. Kúndizgi statsıonarda shamamen 861,9 myń emge 87,5 mlrd teńge bólindi.

Monıtorıng

Áleýmettik medıtsınalyq saqtandyrý qory kórsetilgen medıtsınalyq qyzmetter úshin tólem jasamas buryn qyzmet sapasy men kólemin muqııat tekseredi.

2024 jyly Qor sarapshylary 5,9 mln-nan astam aqaýdy anyqtady. Aqaýlardyń basym bóligi 3.0 «Medıtsınalyq qyzmettiń kólemin negizsiz úlkeıtý», 1.0 «Medıtsınalyq kómek kórsetý negizsizdigi», 6.0 «Emdik-dıagnostıkalyq sharalardy standarttarǵa saı kelmeýi» syndy kodtar boıynsha anyqtaldy.

— Kórsetildi dep jazylyp, kórsetilmegen em-dom (5.0 aqaýy — «Medıtsınalyq kómek kórsetý (qyzmet) faktisiniń rastalmaýy») máselesine kelsek, aqparattyq júıe derekteri boıynsha ótken jyly osyndaı 43,3 myńnan astam jaǵdaı tirkeldi, ıaǵnı 2023 jylǵa qaraǵanda 6%-ǵa az. Bul aqaý eń mańyzdy máselelerdiń biri bolyp sanalady jáne Qor tarapynan qyzmetterdi satyp alý kelisimshartyn merziminen buryn buzýǵa negiz bolýy múmkin, — dedi Svetlana Ponomareva.

Oń úrdisterge kelsek, byltyr medıtsınalyq qyzmetterdi uzaq kútýge qatysty shaǵymdar 3,6 ese azaıdy. Jalpy alǵanda, negizdi dep tanylǵan shaǵymdardyń sany 24,2%-ǵa tómendedi. Medıtsınalyq kómek/qyzmet kólemin negizsiz asyra kórsetý boıynsha anyqtalǵan kemshilikter 22,5%-ǵa azaıdy. Sonymen qatar patologoanatomııalyq dıagnostıkadaǵy kemshilikter sany 89%-ǵa, baǵdarlamalyq dıalız boıynsha — 64%-ǵa, qan jáne onyń komponentterin óndirýge, jergilikti densaýlyq saqtaý uıymdaryna arnalǵan preparattarǵa jumsalatyn shyǵyndar boıynsha — 40%-ǵa, juqpaly aýrýlarmen aýyratyn patsıentterge kórsetiletin medıtsınalyq kómek boıynsha 13%-ǵa tómendegeni baıqalady.

Esterińizge sala keteıik, buǵan deıin Qor monıtorıng júrgizý tásilderin ózgertkenin jarııalaǵan bolatyn. Endi monıtorıng Qordyń biryńǵaı aqparattyq júıesinde júzege asyrylady. Sonymen qatar eksterrıtorıaldyq prıntsıp engizilip, úsh kezeńdi appelıatsııa múmkindigi qarastyryldy.