MÁMS: Almatylyqtardy emdeý sharalaryna 182,2 mlrd teńge jumsalady

ALMATY. QazAqparat – 2020 jyly almatylyqtardyń densaýlyǵyn saqtaýǵa 182,2 mlrd teńge jumsaý josparlanyp otyr. Jańa reforma men tarıfterdi teńestirýdiń nátıjesinde bıyl bul qarajat 1,5 esege artýda. Sonyń ishinde, statsıonardy almastyratyn kómekke bólinetin qarjy kólemi 2 ese kóbeıdi, dep habarlaıdy QazAqparat tilshisi.

Medıtsınalyq saqtandyrý qory Almaty fılıalynyń málimetinshe, bıyldan bastap statsıonardy almastyratyn kómek saqtandyrý paketke engizilgen. Bul qyzmet túrin saqtandyrylǵan azamattar táýliktik statsıonarlar men emhanalyq-ambýlatorııalyq kómek nysandary arqyly ala alady. Sonymen qatar, statsıonardy almastyratyn kómek úı jaǵdaıynda da kórsetiledi.

Statsıonardy almastyratyn kómekke: joǵary tehnologııalar arqyly jasalatyn, dárigerdiń baqylaýymen kórsetiletin qyzmet túrleri kiredi. Kúndizgi statsıonar qyzmetine: dárigerdiń qabyldaýy, salalyq mamandardyń konsýltatsııasy, dıagnostıkalyq zertteý túrleri jatady.

Atalmysh kómek táýliktik statsıonarlarda da kórsetiledi. Ol úshin ýchaskelik dárigerdiń joldamasy qajet. Ota jasar aldynda arnaıy daıyndyqty jáne reanımatsııalyq qoldaýdy qajet etetin patsıent aýrýhanaǵa jatqyzylady. Al, shuǵyl jaǵdaılarda joldamany statsıonardyń dárigeri beredi.

Sondaı-aq, táýlik boıǵy statsıonardan shyqqan patsıentter, qan quıýdy qajet etetin, áseri kúshti ınektsııalardy saldyratyn, hımııa, sáýleli terapııany qajet etetin, sáýleli terapııa saldaryn retteýge zárý bolǵan patsıentter de táýlik boıǵy statsıonarǵa jatqyzylady.

Al, sozylmaly syrqaty asqynǵan patsıentter ómirge qaýip tónbegen jaǵdaılarda emhananyń kúndizgi statsıonarynda emdele alady. Sonymen qatar, olar josparly saýyqtyrý kýrsynan ótedi. Keshendi ońaltýdyń úshinshi kezeńine jatatyn patsıentter de kúndizgi statsıonarda emdele alady.

«Kúndizgi statsıonarda emdelý úshin saqtandyrylǵan turǵynnyń qolynda ýchaskelik dárigerdiń joldamasy bolýy shart. Al, áleýmettik mańyzy bar, qaýipti jáne negizgi sozylmaly aýrýlarǵa shaldyqqan patsıentter burynǵysha, tegin medıtsınalyq kómek paketi boıynsha emdeletin bolady», - dedi fılıal dırektory Nurlybek Qabdyqaparov.

Aıta ketken jón, syrqattar emhanalar men statsıonarlarda 3 kúnnen 8 jumys kúnine deıin emdele alady. Al úı jaǵdaıynda kem degende 3 jumys kúnin, ótkir aýrýlar kezinde ary ketse 5 jumys kúnin qurasa, sozylmaly syrqattar asqynǵan kezde emdelý merzimi 8 jumys kúninen aspaýy tıis.

Esterińizge salaıyq, medıtsınalyq kómek tıisinshe kórsetilmegen jaǵdaıda medıtsınalyq saqtandyrý qorynyń 1406 baılanys nómirine shaǵymdanýǵa bolady.