MÁMS: Almatyda 450 myń adam saqtandyrylmaǵan
Otyrys barysynda bıylǵy jyldyń 8 aıynyń qorytyndysy boıynsha qalyptasqan jaǵdaı jáne ózin-ózi jumyspen qamtyǵan halyqtyń derekterin jańartý boıynsha qabyldanǵan sharalar, sondaı-aq jumysshylardyń saqtandyrý júıesinen shyǵýyn boldyrmaý boıynsha júrgizilip jatqan jumystar qarastyryldy.
Almatyda medıtsınalyq saqtandyrý júıesinde saqtandyrylǵandardyń sany 1,6 mln adam (78%), 450 myńǵa jýyq adam saqtandyrylmaǵan.
«Áleýmettik medıtsınalyq saqtandyrý qory» KEAQ Almaty fılıalynyń dırektory Tileýhan Ábildaevtyń aıtýynsha, mindetti medıtsınalyq saqtandyrý júıesimen halyqty qamtýdy keńeıtý maqsatynda aǵymdaǵy jyldyń 8 aıynda qala turǵyndarymen jáne 13 myńnan astam adamdy qamtıtyn medıtsına qyzmetkerlerimen 7730 jeke konsýltatsııa, 430 kezdesý men trenıngter ótkizildi.
Sonymen qatar, joǵary oqý oryndary Qazaqstan Respýblıkasy Bilim jáne ǵylym mınıstrliginiń «Ulttyq bilim berý derekter qory» aqparattyq júıesinde stýdentterdiń bitirip, oqýǵa túskenderin eskere otyryp, olardyń derekterin jańartý boıynsha jumys atqarylyp jatyr. Sondaı-aq, qalanyń joǵary oqý oryndaryna jańadan qabyldanǵan stýdentterge ýaqytsha mártebe berýdiń MÁMS júıesindegi qadamdyq tirkeý algorıtmi túsindirildi.
Alǵashqy medıtsınalyq-sanıtarlyq kómek uıymyn (MSAK) erkin tańdaý boıynsha tirkeý naýqany ótkizý máselesi qaraldy. Bul baǵytta júıeli jumystar júrgizilýde. Eger ótken jyly qalada 70 myń qaraýsyz halyq bolsa, búginde ol 51 myń (14%-ǵa tómendegen).
Almatylyqtar medıtsınalyq saqtandyrý aıasynda qyzmet kórsetý úshin aǵymdaǵy jyldyń 15 qarashasyna deıin 73 medıtsınalyq uıymǵa qosylý múmkindigine ıe boldy: 40 - memlekettik jáne 33 - jeke.
Taldaý nátıjeleri boıynsha eńbekke qabiletti jastaǵy adamdardyń saqtandyrylmaǵandyǵy anyqtaldy. Osyǵan baılanysty ákimniń orynbasary Erjan Babaqumarov saqtandyrylmaǵan azamattardy qala ekonomıkasyna tartý boıynsha júrgizilip jatqan sheshimder aıasynda birqatar naqty tapsyrmalar berdi.
Qala aýdandarynyń ákimdikteri Kásipkerlik jáne ınvestıtsııalar basqarmasymen, Kásipkerler palatasymen jáne aýmaqtyq memlekettik kirister departamentimen birlesip, mindetti medıtsınalyq saqtandyrý júıesine ShOB-dan aýdarymdardyń ýaqytyly aýdarylýyn baqylaýdy kúsheıtýi qajet.
Qoǵamdyq densaýlyq, Áleýmettik ál-aýqat basqarmalary men alǵashqy medıtsınalyq-sanıtarlyq kómek departamentterine Respýblıkalyq elektrondy densaýlyq ortalyǵymen birlese otyryp, taǵaıyndalǵan turǵyndardyń tizilimindegi derekterdi jańartý úshin aýlalyq aınalymdy kúsheıtilgen baqylaýǵa alý tapsyryldy.
NEET sanatyndaǵy stýdentter men jastardyń mártebesi jańartylýyn qamtamasyz etý (stýdentter emes, jumys istemeıtinder jáne biliktilikterin joǵarylatpaıtyndar).
Eske salsaq, medıtsınalyq kómek alý problemalaryn boldyrmaý úshin barlyq azamattarǵa Qoldau 24/7 qosymshasy, Saqtandyry telegrammalyq boty jáne fms.kz saıty arqyly MÁMS júıesindegi mártebesin tekserýge keńes beriledi. Saqtandyrý mártebesi bolmaǵan jaǵdaıda, jarnalardy tóleýdi bastaý usynylady.
