MÁMS: Almaty qalasynyń densaýlyq saqtaý júıesi 214 mlrd teńge aldy

ALMATY. QazAqparat - Almaty qalasynyń áleýmettik medıtsınalyq saqtandyrý qorynyń basshysy Tileýhan Ábildaev onlaın brıfıng barysynda mindetti áleýmettik medıtsınalyq saqtandyrý júıeniń jetistigi týraly aıtty, dep habarlaıdy QazAqparat tilshisi.

Tileýhan Ábildaevtyń aıtýynsha, Qazaqstanda ekinshi jyl medıtsınalyq saqtandyrý júıesi jumys isteýde. Onyń bastalýy pandemııa kezeńimen tuspa-tus keldi, alaıda koronavırýspen úzdiksiz kúreske qaramastan, MÁMS medıtsınalyq saqtandyrý júıesiniń tolyqqandy jumys isteıtinin kórsetti.

Medıtsınalyq saqtandyrýdyń arqasynda Almaty qalasynyń densaýlyq saqtaý júıesi 2021 jyly 214 mlrd teńgeden astam qarjy aldy.

«2021 jylǵa naqtylanǵan bıýdjet 214,6 mlrd teńgeni qurap, 2020 jylǵy bıýdjetten 3%-ǵa ósti, onyń ishinde tegin medıtsınalyq kómektiń kepildik berilgen kóleminiń sheńberinde 127,1 mlrd teńge, MÁMS paketinde 87,5 mlrd teńge», - deıdi spıker.

Ótken jylmen salystyrǵanda joǵary tehnologııalyq operatsııalardy qarjylandyrý artty. Eger 2020 jyly olardy júrgizýge 11,8 mlrd teńge bólinse, bıyl 12,9 mlrd teńge bólindi.

Tileýhan Ábildaev mindetti medıtsınalyq saqtandyrýdyń arqasynda EKO sııaqty qymbat qyzmetter qoljetimdi bola bastaǵanyn atap ótti.

«Mysaly, eger 2020 jyly 563 mln teńge somasynda 643 EKO manıpýlıatsııasy júrgizilse, bıyl 1238 qyzmetke 1,1 mlrd teńge bólindi. Ósim 2 ese baıqalady. Osy jyldyń 4 aıynda somasy 434 mln teńgege EKO-nyń 459 rásimi ótkizildi», - dedi medıtsınalyq saqtandyrý qorynyń ókili.

Sondaı-aq, byltyr 184 kardıohırýrgııalyq ota jasaldy, bıyl 631 mln teńgege 270 qyzmet kórsetý josparlanǵan.

Qor osy jyldyń 4 aıynda Almaty qalasy boıynsha MÁMS paketinde medıtsınalyq kómekke aqy tóleýge shamamen 42,6 mlrd teńge jumsady.

Sonymen qatar, qor halyqqa joǵary tehnologııalyq qyzmet kórsetkeni úshin 6,3 mlrd teńgeden astam qarajat tóledi, taǵy 2 mlrd teńge kúndizgi statsıonar qyzmetterin tóleýge baǵyttaldy.

MÁMS júıesi aıasynda josparly skrınıngterge 400 mln teńge, ońaltý kómegine 3 mlrd teńge bólindi. Ońaltý qyzmetterine 7,7 mlrd teńge bólindi. Bul medıtsınalyq saqtandyrý bastamalarynyń biri – halyq úshin ońaltýdyń qoljetimdiligin arttyrý.

Jyl saıyn ońaltýdy usynýshylar sany artyp keledi. Mysaly, 2019 jyly qalada ońaltý qyzmetterin tek 4 emhana kórsetken bolsa, qazir olardyń sany 73-ke jetti.