MÁMS: Almaty dárigerleri alǵash ret kúrdeli endovaskýlıarlyq operatsııa jasady
Bul týraly Medıtsınalyq saqtandyrý qorynyń Almaty fılıalynda málim etti, dep habarlaıdy QazAqparat tilshisi.
46 jastaǵy patsıent aýrýhanaǵa tik ishekten qan ketkennen keıin habarlasqan. Aıtýynsha, onyń bul dertke shaldyqqanyna 5 jyldan asqan kórinedi. Sońǵy birneshe aıda sozylmaly gemorroı asqynyp, dáretke otyrýy múldem qıyndapty.
Tıisti dıagnostıkalyq tekserýlerden keıin dárigerler oǵan 2-dárejeli sozylmaly gemorroı dıagnozyn qoıyp, ota jasaý týraly sheshim qabyldady. Patsıenttiń tik ishek arterııalaryna endovaskýlıarlyq embolızatsııa jasaldy.
Proktolog maman Marat Kalenbaevtyń sózine súıensek, operatsııanyń bul túri dástúrli otanyń qaýipsiz balamasy bolyp tabylady.
«Bul protsedýra narkozsyz jasalady. Onyń ústine, toq ishekti aldyn-ala daıyndaýdy qajet etpeıdi. Shaǵyn ınvazıvti operatsııanyń arqasynda patsıent birneshe saǵattan keıin ornynan turyp júre bastaıdy, dáretke de qınalmaı barady. Sondaı-aq, otanyń orny aýyrmaıdy, sebebi, tilik jasalmaıdy, sondyqtan jara bolmaıdy», - dedi Marat Kalenbaev.
Aıta keteıik, tik ishek arterııalarynyń endovaskýlıarlyq embolızatsııasy klınıkada tuńǵysh ret jasaldy. Oǵan klınıkanyń ınterventsııalyq hırýrgııa bólimi meńgerýshisi Sáken Anartaev jetekshilik etti. Otadan keıin patsıent kóp uzamaı saýyǵyp aýrýhanadan shyqty.
Mamandardyń aıtýynsha, atalǵan emdeý tásili 1, 2 jáne keıde 3-stadııadaǵy syrqattarǵa qoldanylady. Patsıent proktolog dárigerge qanshalyqty erte qaralsa qaýipsiz tásildi qoldanyp emdeý múmkindigi de joǵary bolmaq.
«Innovatsııalyq ota aýrýhanada tuńǵysh ret qoldanyldy. Klınıkadaǵy zamanaýı tehnologııalar men joǵary bilikti mamandardyń arqasynda operatsııa sátti shyqty», - dep habarlady klınıkanyń baspasóz qyzmeti.