MÁMS: Aqmola oblysynda 285 myń adamnyń sanaty anyqtaldy

Bul týraly aımaq basshysy Málik Myrzalınniń tóraǵalyǵymen ótken ákimdik otyrysynda aıtyldy, dep habarlaıdy «QazAqparat» HAA tilshisi.

Otyrysta aldymen kóktemgi tuqym sebý jumystarynyń qorytyndysy shyǵaryldy. Oblystyq aýyl sharýashylyǵy basqarmasynyń basshysy Murat Balpannyń aıtýynsha, aǵymdaǵy jyly oblys boıynsha kópjyldyq shópterdi qosa eseptegende egistik alqaby 4,7 mıllıon gektardy qurady. Onyń ishinde 4,3 mıllıon gektary dándi daqyldar, 241,5 myń gektary maıly daqyldar, 142,2 myń gektary mal azyǵy, 18,3 jáne 4,3 myń gektary kartop pen kókónis.

«Dıqandar agrotehnıkalyq sharalardy oıdaǵydaı júrgizýiniń arqasynda naýqandy 18-20 kúnniń ishinde aıaqtap shyqty. Mańyzdy naýqanǵa 15 myń traktor, 18 myń birlik egis kesheni jumyldyryldy. Onyń 1145 ónimdiligi joǵary egis keshenderi», - dedi Murat Balpan óz sózinde.

Sonymen qatar, otyrysta mindetti áleýmettik medıtsınalyq saqtandyrýdy engizý boıynsha júrgizilgen aqparattyq-túsinikteme jumystarynyń barysy týraly Medıtsınalyq qyzmetterdiń aqysyn tóleý oblystyq departamentiniń basshysy Fazyl Kopobaev aıtyp berdi.

Onyń sózine qaraǵanda, aqparattyq-túsinikteme jumystary barysynda 400 myńnan astam turǵynnyń qatysýymen 9 myńǵa jýyq kezdesý uıymdastyrylǵan.  Onyń ishinde úı-úıdi aralap, aqparattyq materıaldar taratyldy.

 «Aǵymdaǵy jyldyń 5 sáýirinen bastap, mindetti áleýmettik medıtsınalyq saqtandyrý júıesi arqyly azamattardyń sanatyn anyqtaý úshin emhanalarǵa tirkeý naýqany qolǵa alynǵan bolatyn.

Búgingi kúni 285 myń adamnyń sanaty anyqtaldy. Aýdan jáne qala ákimdikteri, memlekettik kirister, ádilet, ishki ister organdarynyń qyzmetkerleri men memlekettik eńbek ınspektorlary, sondaı-aq «Atameken» óńirlik  kásipkerler palatasy birlesip turǵyndar týraly málimetterdi jınaqtap, jumys berýshilermen túsindirý jumystaryn júrgizýde», - dep túsindirdi F.Kopobaev.

Otyrysty qorytyndylaǵan aımaq basshysy Málik Myrzalın bul baǵytta halyqqa túsindirý jumystaryn 100 paıyz qamtýdy tapsyrdy.