MÁMS: 12 mln astam adamǵa stomatologııalyq qyzmet tegin kórsetildi

ASTANA. QazAqparat – Bıylǵy 11 aıda 12 mln astam adamǵa stomatologııalyq qyzmet tegin kórsetildi. Bul týraly QazAqparat Áleýmettik medıtsınalyq saqtandyrý qorynyń baspasóz qyzmetine silteme jasap habarlaıdy.

Mindetti áleýmettik medıtsınalyq saqtandyrý júıesi aıasynda stomatologııalyq kómek halyqtyń belgili bir sanattaryna qoljetimdi. Olar MÁMS boıynsha tisti tegin emdeý múmkindigin belsendi paıdalanady. Máselen, 2021 jyly 10 mln jýyq stomatologııalyq qyzmet kórsetilse, 2022 jyldyń 11 aıynda 12 mln astam qyzmet kórsetildi.

Josparly túrde stomatologııalyq kómek 18 jasqa deıingi balalar men júkti áıelderge qol jetimdi. Al, shuǵyl kómek qajet bolǵan jaǵdaıda, azamattardyń 9 sanaty ala alady:

• 18 jasqa deıingi balalar

• júkti áıelder

• soǵys ardagerleri jáne olarǵa teńestirilgen tulǵalar

• I, II, III toptaǵy múgedekter

• «Altyn alqa» jáne «Kúmis alqa» ıegerleri

• ataýly áleýmettik kómek alýshylar

• jasy boıynsha zeınetkerler

• ınfektsııalyq jáne áleýmettik máni bar aýrýlarmen aýyratyn naýqastar

• erekshe nazar aýdarýdy talap etetin balaǵa nemese bala kezinen I toptaǵy múgedekke kútim jasaıtyn jumys istemeıtin qazaqstandyqtar.

Shuǵyl stomatologııalyq kómek naýqastyń ómirine qaýip tóndiretin kenetten bolatyn ótkir aýrýlar men sozylmaly aýrýlardyń órshýi kezinde kórsetiledi:

- pýlpıt (jedel nemese sozylmalylyqtyń qabynýy)

- perıodontıt (jedel nemese sozylmalylyqtyń qabynýy)

- jaq-bet jaraqaty (mysaly, tistiń shytynaýy nemese synýy)

- jaq-bet aımaǵynyń odontogendik jáne odontogendik emes qabyný aýrýlarynyń órshýi

- stomatıt

- jedel aýyrsyný jaǵdaılary

- shuǵyl hırýrgııalyq aralasýdy qajet etetin emdeýler.

Patsıentterdiń atalǵan sanattary úshin MÁMS paketimen qandaı kómek tegin kórsetiledi?

- anestezııa

- jaq nemese tis rentgenografııasy

- tisti julý

- plombany preparattaý jáne salý

- perıostotomııa

- pýlpıt, perıodontıt, stomatıttiń jedel túrlerin, alveolıtti emdeý

- abstsesti ashý.

Foto: shutterstock.com