«Mamochkıno kladbışe» aımaǵyn memorıaldy keshender qataryna qosý qajet- depýtat
ASTANA. QazAqparat - «Mamochkıno kladbışe» aımaǵyn aza tutý orny retinde tarıhı oryndardyń biryńǵaı memorıaldy keshenderiniń qataryna qosý qajet. Búgin QR Parlamenti Májilisiniń jalpy otyrsynda elimizdiń Mádenıet jáne sport mınıstri Arystanbek Muhamedıulynyń atyna depýtattyq saýal joldaǵan májilismen Nurlan Dýlatbekov osyndaı usynys jasady, dep habarlaıdy QazAqparat.
«Jyl saıyn Saıası qýǵyn-súrgin qurbandaryn eske alý kúni men Rýhanı kelisim kúninde taǵzym jasalatyn oryndardyń biri - «Mamochkıno kladbışe». Karlagtaǵy áıel tutqyndarǵa arnalǵan perzenthana 1931 jyldan beri Karlag «astanasy» bolǵan Dolınka eldi mekeninde ashylǵan bolatyn. Tutqyndardyń sábıleri balalar qalashyǵynda ustaldy. Analary kúnine eki-úsh márte aıdaýyldyń basshylyǵymen kelip, balalaryn qorektendiretin. Keıin sábıler 2-3 jasqa kelgende olardy balalar úılerine aýystyrdy. Munda bala óliminiń kórsetkishi tym joǵary boldy. KSRO NKVD GÝLAG sanıtarlyq bóliminiń málimeti boıynsha tek qana 1939 jyldyń ózinde Karlagtaǵy 350 sábıdiń 114-i kóz jumǵan. Ólgen balalardy aýyldan shyǵa beristegi zıratqa jerledi. Olardyń bárin jınap, ortaq shuńqyrǵa kómip otyrǵan.
Keıbir derekterde qys kezinde ólgen sábılerdi aǵash bóshkelerge jınap, ábden tolǵan soń baryp kómgeni týraly aıtylady. Keıbir zırattarǵa múldem belgi qoıylmaǵan. Munda jekelegen qabirlerdi kezdestirý tipten múmkin emes», - dedi Májilis depýtaty.
Onyń aıtýynsha, ókinishke oraı «Mamochkıno kladbışe» aımaǵy kúni búginge deıin laıyqty qorǵaýǵa alynbaǵan, eshqandaı eskertkish belgileri joq. Osydan birneshe kún buryn vandaldar qasıetti orynnyń oıranyn shyǵarǵan. Urylar zırattaǵy aıqysh temirlerdi metall synyqtaryna tapsyrý maqsatynda urlap ketken.
«Osyǵan baılanysty «Mamochkıno kladbışe» aımaǵyn aza tutý orny retinde tarıhı oryndardyń biryńǵaı memorıaldy kesheniniń qataryna qosýdy usynamyn. Bul ıerotopıkalyq joba eldegi saıası qýǵyn-súrgin qurbandary murajaılarynyń tarıhı-arhıtektýralyq ansamblin biriktirýge múmkindik beretindigine senimdimin. Joǵaryda atalǵan aıtýly oryndardyń ózine ǵana tán aımaqtyq murajaılyq kúıi ortaq keshenge jınaqtalady jáne saıası qýǵyn-súrgin kezeńiniń kórinisi bola alady», - dedi Dýlatbekov.
