Mamlıýtkadaǵy úıdiń opyrylýy: SQO-da apatty úıler máselesi qalaı sheshilmek
PETROPAVL. KAZINFORM – Soltústik Qazaqstan oblysynda apattyq jáne tozǵan úılerdi buzý arqyly menshik ıelerin jańa turǵyn úımen qamtamasyz etý boıynsha Jol kartasy bekitildi.
Mamlıýtkadaǵy úı nege qulady?
Birer apta buryn Mamlıýtka qalasyndaǵy Skachkov kóshesinde ornalasqan eki qabatty kóppáterli turǵyn úıdiń bir podezi opyrylyp tústi. Turǵyndardyń aıtýynsha, olar der kezinde kóship úlgergendikten, eshkim zardap shekken joq.
Onyń aldynda ǵana adamdar páterlerden jıhazdary men jeke zattaryn shyǵaryp, saqtap qalýǵa tyrysqan edi. Qazir olar úıdiń sol ýaqytta qulamaı, ózderiniń aman qalǵandaryna shúkirlik etedi.
Turǵyndar úıdiń apatty jaǵdaıda ekenin jáne qabyrǵalarynda jaryqtar paıda bolǵanyn birneshe ret aıtyp, máselege nazar aýdartýǵa tyrysqandaryn aıtady.
SQO energetıka jáne turǵyn úı-kommýnaldyq sharýashylyq basqarmasynyń málimetinshe, bul úıge qatysty shaǵymdar 2025 jyldan bastap túse bastaǵan. Nátıjesinde «Expert Grýpp» JShS-niń byltyr mamyr aıyndaǵy tehnıkalyq qorytyndysy, vedomstvoaralyq komıssııanyń 2025 jylǵy 20 qarashadaǵy №1 qorytyndysy jáne Mamlıýt aýdany ákimdiginiń 2025 jylǵy 23 jeltoqsandaǵy №364 qaýlysymen baspana apattyq dep tanyldy.
- Turǵyndar úıdiń janynan ınjenerlik jelilerdiń tartylýy jaǵdaıdy ýshyqtyrǵanyn aıtady. Mamlıýt aýdanynyń ákimdigi bul nusqany tekserip jatyr. Qazirgi ýaqytta 8 otbasy tolyq kóshirilip, olarǵa ýaqytsha baspana berildi.
Al jalpy Qazaqstan Respýblıkasynyń «Turǵyn úı qatynastary týraly» Zańynyń 34-babyna sáıkes, páterdiń, turǵyn emes úı-jaıdyń, parkıng ornynyń, qoımanyń menshik ıesi ózine tıesili múlikti, sondaı-aq kondomınıým obektisiniń ortaq múlkin kútip-ustaý aýyrtpalyǵyn kóteredi, - deıdi SQO energetıka jáne turǵyn úı-kommýnaldyq sharýashylyq basqarmasy basshysynyń orynbasary Janat Sádýaqasov.
Búginde aýmaq qorshalǵan, óıtkeni úıdiń qalǵan bóliginiń qulaý qaýpi bar.
Óńirde qansha apatty úı bar?
Vedomstvonyń málimetinshe, SQO boıynsha 38 kópqabatty úı apatty dep tanylǵan.
- Ulttyq statıstıka bıýrosynyń málimetterine súıensek, Petropavlda - 28, Aqjar jáne Mamlıýt aýdandarynda - úsh úıden, Aqqaıyń, Esil, Qyzyljar jáne Ǵabıt Músirepov atyndaǵy aýdandarda bir-birden úı apatty jaǵdaıda tur.
2025 jylǵy 21 aqpanda 2029 jylǵa deıin apattyq jáne tozǵan úılerdi buzý arqyly menshik ıelerin jańa turǵyn úımen qamtamasyz etý boıynsha Jol kartasy bekitildi.
SQO boıynsha 2029 jylǵa deıin osy úılerdegi 356 menshik ıesin jańa turǵyn úımen qamtamasyz etý josparlanǵan, - deıdi Janat Sádýaqasov.
«Jańa Qala» baǵdarlamasy aıasynda ne isteledi?
Petropavldaǵy «eski» aýdandardy kórkeıtý maqsatynda «Jańa Qala» renovatsııalyq baǵdarlamasy qabyldanǵan.
Osy joba aıasynda bıyl 5 úıdi buzý josparlanǵan.
- 2027 jylǵa 3 apatty úı;
- 2028 jylǵa baǵdarlamaǵa 7 úı;
- 2029 jylǵa osy sanattaǵy 8 úı josparǵa engizilgen.
Kúrdeli jóndeýge qarjy bólingen be?
Mamandardyń aıtýynsha, 2011 jyldan 2025 jylǵa deıingi kezeńde respýblıkalyq bıýdjet, qaıtarymdy qarjylandyrý tetikteri jáne jergilikti bıýdjet qarajatyn qosa alǵanda, 5,5 mlrd teńge somasyna 227 kóppáterli turǵyn úıge kúrdeli jóndeý júrgizildi.
- Osy jyly beıindi mınıstrlikke jalpy somasy 1 321,9 mln teńgege 15 kópqabatty turǵyn úıge kúrdeli jóndeý júrgizýge bıýdjettik ótinim joldandy, qazirgi ýaqytqa deıin qarajat bólingen joq, - deıdi Janat Sádýaqasov.
Vedomstvonyń málimetinshe, qazirgi ýaqytta SQO-da 900-den astam úı kúrdeli jóndeýdi qajet etedi, onyń ishinde 327 úı aýdandarda ornalasqan.
Tasqynnan keıin qansha adam jańa baspana aldy?
Mamandardyń aıtýynsha, 2024 jyly sý tasqyny saldarynan 3898 úı sý astynda qaldy, onyń 2094 úıi apatty dep tanyldy. Bul úıler buzylyp, Petropavl men Qyzyljar aýdanynda sý tasqynynan zardap shekken 2197 menshik ıesiniń turǵyn úı jaǵdaıy jaqsardy. Petropavlda 1394 páter, «Birlik» shaǵyn aýdanynda 700 úı berildi.
Buǵan deıin Aqtóbede kópqabatty turǵyn úılerdiń 16% jýyǵy kúrdeli jóndeýdi qajet etetinin jazǵan edik.
