Mamlıýt aýdanynyń turǵyny koronavırýsty Túmen qalasynda juqtyrǵan - SQO
PETROPAVL. QazAqparat – Soltústik Qazaqstan oblysynda taǵy bir turǵynnyń koronavırýs juqtyrǵany belgili boldy, dep habarlaıdy QazAqparat tilshisi.
19 sáýir saǵat 23.10-daǵy jaǵdaı boıynsha SQO-da COVID-19 ınfektsııasyn juqtyrǵandar sany 30-ǵa jetti. Taýarlar men kórsetiletin qyzmetterdiń sapasyn baqylaý departamenti baspasóz qyzmetiniń málimetinshe, naýqas Soltústik Qazaqstan oblysy Mamlıýt aýdanynyń 1994 jyly týǵan turǵyny. 15 sáýir kúni RF Túmen qalasynan elge kelgen. Sol kúni qaýipti indetke teksergende teris nátıje kórsetken.
Alaıda 18 sáýir kúni jigittiń dene qyzýy 37,9 gradýsqa deıin kóterilip, basy aýyryp, Mamlıýt aýdanynda provızorlyq statsıonarǵa jatqyzylady. Sol jerde COVID-19 taldaý alynyp, onyń koronavırýsty juqtyrǵany rastaldy.
«KVI oń nátıje kórsetkennen keıin naýqas Petropavldaǵy birinshi qalalyq aýrýhananyń juqpaly aýrýlar bólimine aýystyryldy. Infektsııalyq bólimshege túsken kezde jaǵdaıy qanaǵattanarlyq boldy, dene qyzýynyń joǵarylaýy baıqalmady. Bekitilgen hattamaǵa sáıkes tıisti em júrgizilýde», - delingen baspasóz habarlamasynda.
Kimdermen baılanysta bolǵanyn anyqtaý maqsatynda epıdemıologııalyq tekserý júrip jatyr. Aýrý oshaqtarynda dezınfektsııalyq jumystar júrgizildi.
19 sáýir saǵat 23.10-daǵy jaǵdaı boıynsha elimizde taǵy 35 adamnyń qaýipti indetti juqtyrǵandyǵy anyqtaldy.
