Mamyrdyń sońǵy kúnderi jańbyrly bolady, úsik júredi

ASTANA. KAZINFORM — Qazgıdromet sınoptıkteri 28-30 mamyr aralyǵyna arnalǵan úsh kúndik aýa raıy boljamyn jarııalady. 

Kezekti tsıklon jáne soǵan baılanysty atmosferalyq fronttar Qazaqstannyń barlyq aýmaǵynda aýa raıyn qalyptastyrady.

Ol ózimen birge jańbyr ákeledi.

28 mamyrda elimizdiń soltústigi men shyǵysynda qatty jańbyr jaýady, túngi ýaqytta onyń sońy dymqyl qarǵa aınalýy múmkin.

Temperatýra aıtarlyqtaı joǵarylamaıdy.

28 mamyrda batysta, soltústikte jáne ortalyqta, 29-30 mamyrda shyǵysta túngi ýaqytta 3 gradýsqa deıin úsik júredi.

Elimizdiń batysynda ǵana joǵary qysym órisi jaýyn-shashynnyń toqtaýyna jáne túnde de, kúndiz de aýa temperatýrasynyń birtindep kóterilýine sebepshi bolady.