Mamyrdan keıin UBT-da beıindik pánderdi ózgertýge bolmaıdy

ASTANA. KAZINFORM — Astana qalasy kommýnıkatsııalar qyzmeti alańynda ótken brıfıngte Ulttyq testileý ortalyǵy dırektorynyń orynbasary Naýjan Dıdarbekova Ulttyq biryńǵaı testileýge (UBT) qatysty saýaldarǵa jaýap berdi. 

Onyń aıtýynsha, talapkerler ótinish qabyldaý merzimi aıaqtalǵanǵa deıin jeke kabınet arqyly beıindik pánderdi ózgerte alady. Alaıda bul múmkindik barlyq kezeńde birdeı qarastyrylmaǵan.

— Qańtar, naýryz jáne tamyz aılaryndaǵy UBT kezinde talapkerler beıindik pánderin ózgerte alady. Al mamyr-shilde aılaryndaǵy negizgi UBT tapsyrý barysynda birinshi múmkindikten keıin beıindik pánderdi ózgertýge bolmaıdy. Mysaly, talapker alǵashqy múmkindikte matematıka-ınformatıka kombınatsııasyn tańdasa, ekinshi múmkindikte ony ózgerte almaıdy. Al qańtarda hımııa-bıologııa kombınatsııasymen tapsyryp, naýryzda matematıka-ınformatıka pánderin tańdaýǵa bolady, — dedi ol.

Sondaı-aq spıker UBT sertıfıkatynyń jaramdylyq merzimine toqtaldy.

— 2026 jyly berilgen UBT sertıfıkaty 2026 jyldyń 31 jeltoqsanyna deıin jaramdy, ıaǵnı sertıfıkat test tapsyrylǵan jyldyń sońyna deıin ǵana qoldanylady, — dep naqtylady Naýjan Dıdarbekova.

Budan bólek, qańtar nemese naýryz aılaryndaǵy UBT-da shekti ball jınaı almaǵan talapkerlerdiń negizgi testileýge qatysýyna bul jaǵdaı áser etpeıtini aıtyldy.

— Árbir UBT-ǵa tirkelý jeke júrgiziledi. Qańtar, naýryz, negizgi jáne tamyz aılaryndaǵy testileýlerdiń nátıjeleri bir-birine áser etpeıdi. Ár testileý qorytyndysy boıynsha jeke sertıfıkat beriledi, — dedi vedomstvo ókili.

Buǵan deıin 2026 jylǵy qańtar UBT-syn 184 myńǵa jýyq adam ótti. Talapkerlerdiń 75%-y testileýdi qazaq tilinde, 25%-y orys tilinde jáne 113 adam aǵylshyn tilinde tapsyrǵanyn jazǵanbyz.