Mamyrdan bastap Qazaqstan munaıy Germanııaǵa «Drýjbadan» basqa baǵyttarmen jetkiziledi – RF vıtse-premeri
ASTANA. KAZINFORM – Buryn «Drýjba» qubyrjolymen Germanııaǵa jóneltilgen qazaqstandyq munaı kóleminiń logıstıkalyq baǵyty 2026 jyldyń 1 mamyrynan bastap ózgeredi. Bul týraly tilshilerge Reseı premer-mınıstriniń orynbasary Aleksandr Novak habarlady, dep jazdy TASS aqparat agenttigi.
— 1 mamyrdan bastap buryn «Drýjba» arqyly Germanııaǵa jetkizilgen qazaqstandyq munaı kólemi basqa, bos logıstıkalyq baǵyttarǵa baǵyttalady. Bul búgingi kúnde tehnıkalyq múmkindikterge baılanysty, — dedi ol.
Vıtse-premerdiń naqtylaýynsha, RF Energetıka mınıstrligi men «Transneft» kompanııasy aǵyndardy qaıta baǵyttaý boıynsha jumys istep jatyr.
QR Energetıka mınıstrligi «Drýjba» munaı qubyry júıesi arqyly Germanııaǵa munaı tranzıtine qatysty BAQ-ta taraǵan aqparatqa túsinikteme berdi.
Vedomstvo málimetinshe, qazirgi ýaqytta reseılik taraptan Atyraý — Samara — «Drýjba» baǵyty boıynsha qazaqstandyq munaı tranzıtine qandaı da bir shekteýler engizilgeni týraly resmı habarlama túspegen.
Qazaqstannyń ulttyq operatory «Qaztransoıl» kompanııasy munaı tranzıtin «Transneft» qubyr júıesi arqyly Reseı arqyly qamtamasyz etip otyr. Sodan keıin qazaqstandyq munaı Belarýs aýmaǵy arqyly «Gomeltransneft Drýjba» qubyr júıesimen «Adamova Zastava» munaı jetkizý pýnktine aıdalyp, odan ári Germanııadaǵy munaı óńdeý zaýytyna jetkiziledi. Bul tranzıt Qazaqstan men Reseı arasynda 2002 jylǵy 7 maýsymdaǵy tıisti úkimetaralyq kelisim sheńberinde júzege asyrylyp otyr.
2025 jyly Qazaqstan «Drýjba» qubyry arqyly Germanııaǵa 2,1 mln tonna munaı jetkizdi. 2026 jyly respýblıka bıligi bul kólemdi 2,5 mln tonnaǵa deıin arttyrýdy josparlaǵan bolatyn.
