Mamyrajaı emes mamyr: Aqmola oblysynda qar jaýyp jatyr

ASTANA. KAZINFORM - Aqmola oblysynda qar jaýdy. Buǵan deıin Qazgıdromet aýa temperatýrasy nólden tómen túsetinin habarlaǵan.

Aqkól men Ereımentaý qalalarynda, sondaı-aq elordaǵa jaqyn basqa eldi mekenderde qalyń qar jaýdy.

Turǵyndar tabıǵattyń tosyn kórinisin vıdeoǵa túsirip, áleýmettik jelilerde bólisýde. 

«QazAvtoJol» Almaty-Ekaterınbýrg jol ýchaskesiniń (Kolýton stansasy – Novocherkasskoe aýyly) ashylǵanyn habarlady.

«Jol qaýipsizdigin qamtamasyz etý úshin «QazAvtoJol» fılıalynyń qyzmetkerleri joldardaǵy qardy jedel tazartyp jatyr», - dep habarlady «QazAvtoJol».

Buǵan deıin Qazgıdromet jaýyn-shashyn jaýyp, aýa raıynyń qolaısyz bolatynyn eskertken.

Máselen, Astanada 25 mamyrda kúndiz qatty jańbyr jaýyp, ekpindi jel soǵady. Soltústik-shyǵystan jel soǵady, ekpini 15-20 m/s, keı jerlerde 23 m/s kúsheıedi.

Túnde Aqmola oblysynyń ońtústik-shyǵysynda keı jerlerde qatty jaýyn-shashyn (jańbyr qarǵa aınalady)bolady, kúndiz oblystyń ońtústik-shyǵysynda ótkinshi jańbyr jaýady.

Oblystyń batysynda, ońtústiginde jáne shyǵysynda burqasyn bolady. Túnde jáne tańerteń oblystyń soltústik-batysynda tuman kútiledi. Soltústik-shyǵystan soǵatyn jel oblystyń batysynda, ońtústiginde, shyǵysynda 15-20, ekpini 23-28 m/s. Túnde oblystyń soltústik-batysynda -2°S úskirik kútiledi.