Mamyr aıynyń basynda jel kúsheıip, qar aralas jańbyr jaýady

ASTANA. KAZINFORM – Mamyr aıynyń basynda Qazaqstan aýmaǵynda barıkalyq qurylymdardyń tez ózgerýine baılanysty aýa raıy turaqsyz bolady dep kútiledi. Bul týraly «Qazgıdromet» RMK málim etti.

Sınoptıkter naızaǵaıly jańbyr, jeldiń kúsheıýi, soltústik, shyǵys jáne ońtústik-shyǵystyń taýly aımaqtarynda túnde jańbyr men qar túrindegi jaýyn-shashyn bolatynyn boljaǵan.

2 mamyrda respýblıkanyń ońtústik-shyǵysynda qatty jańbyr, taýly aımaqtarda – qatty jaýyn-shashyn (jańbyr, qar) kútiledi.

Tek Qazaqstannyń ońtústiginde ǵana jaýyn-shashynsyz aýa raıy boljanýda. Soltústik-batysta, soltústikte, ortalyqta jáne ońtústik-shyǵysta kúndiz burshaq jaýýy múmkin.

Batys pen ońtústikte shańdy daýyl kútiledi. Respýblıka boıynsha túngi jáne tańǵy saǵattarda tuman túsedi.

Temperatýralyq jaǵdaıda kúrt ózgerister kútilmeıdi.

Eske sala keteıik, buǵan deıin Qyzylorda, Jambyl, Túrkistan oblysynyń batysynda, Almaty oblysynyń ortalyǵynda, Atyraý, Aqtóbe, Qaraǵandy, Shyǵys Qazaqstan oblystarynyń ońtústiginde, Mańǵystaý oblysynyń soltústik-shyǵysynda, shyǵysynda, ortalyǵynda, Ulytaý oblysynyń ortalyǵynda, Jetisý oblysynyń batysynda, ońtústiginde, Abaı oblysynyń soltústik-batysynda, ońtústiginde joǵary órt qaýpi týyndaıtynyn jazǵan bolatynbyz.