Mamyr aıynda elektrondyq eńbek bırjasynda 86 myń bos jumys orny usynyldy

Mamyr aıynda Enbek.kz elektrondyq eńbek bırjasynda 86 myń bos jumys orny men 110 myń túıindeme ornalastyryldy. Ótken aımen salystyrǵanda olardyń sany sáıkesinshe 11,8% jáne 4,3%-ǵa azaıdy.

Kadrǵa eń joǵary qajettilikti dástúrli túrde bilim berý (15 myńnan astam bos jumys orny), qyzmet kórsetýdiń basqa túrleri (10,7 myń) jáne qurylys (8,5 myń) salalary kórsetti. Suranys negizinen iri qalalar men agroónerkásiptik aımaqtarda shoǵyrlandy.

- Ortasha bilikti mamandar tapshylyǵy baıqaldy – suranys usynystan 16%-ǵa asyp tústi.

Sonymen qatar, joǵary bilikti laýazymdarǵa jumys berýshilerdiń usynystarynan san jaǵynan asyp túsetin jumys izdeýshiler tarapynan básekelestik kúsheıdi.

Jumys berýshilerdiń eń joǵary belsendiligi Astana qalasynda (barlyq bos jumys oryndarynyń 11,5%-y), Túrkistan (7,5%) jáne Pavlodar (7,1%) oblystarynda tirkeldi. Birqatar óńirlerde bos jumys oryndarynyń sany tórtten birinen astamǵa qysqardy: Batys Qazaqstan oblysynda – 36%-ǵa, Almatyda – 35%-ǵa, Mańǵystaýda – 34%-ǵa, Ulytaýda – 25%-ǵa, - dep jazdy Eńbek jáne halyqty áleýmettik qorǵaý mınıstrliginen.

Derekke qaraǵanda, 34 jasqa deıingi jastar jumys izdeýshilerdiń eń belsendi sanaty bolyp qaldy – olar barlyq túıindemelerdiń 44%-yn quraıdy (110 myńnyń 48,6 myńy). Olardan keıin orta jastaǵy úmitkerler (37%). Jynysy boıynsha barlyq jumys izdeýshilerdiń 52,8%-yn áıelder, 47,2%-yn erler quraıdy.

Jumys izdeýshiler belsendiliginiń tómendeýi Almaty qalasynda (-28%) baıqaldy, basqa óńirlerdiń kópshiliginde tómendeý kórsetkishi 15%-dan aspady.

Suranysqa ıe mamandyqtardyń ishinde tártip saqshylaryna (1,8 myń bos oryn), medbıkeler (1,7 myń) men júrgizýshilerge (1,5 myń) suranys saqtaldy.

- Jalaqy boıynsha eń kóp usynystar taý-ken ónerkásibindegi basshynyń orynbasary (orta eseppen 788 myń teńgeden), bas qurylysshy (662 myńnan) jáne burǵylaýshy-ınjener (605 myńnan) laýazymdaryna tirkeldi.

Jumys izdeýshiler arasynda eń joǵary jalaqy kútetin ushqysh (orta eseppen 2,3 mln teńgeden), IT jobalardy ázirleý bóliminiń basshysy (1,2 mln teńge), óndirýshi saladaǵy ýchastke basshysy (1,1 mln teńge) laýazymdaryna úmitkerler tirkeldi, - delingen aqparatta.

Osylaısha, mamyr aıynda jumys berýshiler tarapynan da, jumys izdeýshiler tarapynan da belsendiliktiń qalypty tómendeýi baıqalady. Jalpy jumysshylar, júrgizýshiler, kúzetshiler jáne medıtsına qyzmetkerleri suranysqa ıe bolyp qala beredi. Kútiletin jalaqy deńgeıi, ádette, jasyna qaraı ósedi, bul kásibı tájirıbe, biliktilik jáne mansaptyq ambıtsııalar arasyndaǵy qatynasty kórsetedi.

Aıta keteıik, Úkimet basshysy eldegi eńbek qaýipsizdigin arttyrý úshin 3 naqty tapsyrma berdi.