Mamyr aıynda Dýshanbede sý resýrstary jónindegi halyqaralyq konferentsııa ótedi

ASTANA. KAZINFORM — Dýshanbede sý resýrstary jónindegi tórtinshi konferentsııaǵa 30-dan astam elden 2,5 myńnan astam delegat jınalady, dep habarlaıdy Kazinform agenttiginiń Tájikstandaǵy menshikti tilshisi. 

— Mıllıardtaǵan adam áli kúnge deıin qaýipsiz aýyzsý men sanıtarııaǵa qol jetkize almaı otyr. Klımattyń ózgerýi, halyq sanynyń ósýi jáne tabıǵı apattar qaýpi buryn-sońdy bolmaǵan qysym kórsetip otyr, bul konferentsııa taqyrybyn óte ózekti etedi, — dep málimdedi vıtse-mınıstr Sanoı Boızoda TR Syrtqy ister mınıstrliginde ótken baspasóz máslıhatynda.

Dıplomattyń atap ótýinshe, joǵary deńgeıdegi Halyqaralyq konferentsııa memleket jáne úkimet basshylary, mınıstrler, BUU qurylymdary, halyqaralyq jáne aımaqtyq uıymdar, qarjy ınstıtýttary, ǵylymı mekemeler jáne azamattyq qoǵam ókilderiniń basyn qosady.

— 31 memleket, 33 halyqaralyq uıym jáne qarjy ınstıtýty qatysýyn rastady. Forýmǵa 2,5 myńnan astam delegat jınalyp, ol jahandyq sý máselelerin talqylaýǵa arnalǵan alańǵa aınalatyny kútilip otyr, — dep aqparattandyrdy TR SІM Energetıkalyq saıasat departamentiniń basshysy Rýstam Abdýllaev.

«Sý turaqty damý úshin 2018–2028 jyldar» Halyqaralyq is-qımyldar onjyldyǵyna arnalǵan joǵary deńgeıdegi halyqaralyq konferentsııa 2026 jyldyń 25-28 mamyry aralyǵynda Tájikstannyń Dýshanbe qalasynda ótedi. Dýshanbe sý protsesi burynǵy konferentsııalarynyń (2018, 2022, 2024) jetistikterine súıene otyryp forým 2026 jyly Birikken Ulttar Uıymynyń sý konferentsııasyna (Senegal jáne BAÁ) daıyndyqtyń negizgi kezeńi bolmaq.

Osyǵan deıin Tájikstanda Ulttyq sý keńesi óz jumysyn bastaǵanyn habarladyq.