Mamınge Petropavl áýejaıynyń jańa termınaly kórsetildi
PETROPAVL. QazAqparat - QR Premer-Mınıstriniń birinshi orynbasary Asqar Mamınniń Soltústik Qazaqstan oblysyna jumys sapary áýejaı termınalyn tekserýden bastaldy, dep habarlady QazAqparat tilshisi.
Ázirge ushaqtar Petropavl halyqaralyq áýejaıynan Astanaǵa aptasyna eki ret qana ushady. Jeltoqsan aıynyń ortasynda Almatyǵa reıs ashylady dep kútilýde. Kelesi jyly «Máskeý-Petropavl-Máskeý» áýe baǵyty josparda bar. «Termınaldy qalpyna keltirý jumystary aıaqtalýǵa jaqyn. Onyń tehnologııalyq jabdyqtary tolyq aýystyryldy. Jóndeý jumystarynan keıin áýejaı azamattyq avıatsııanyń halyqaralyq standarttaryna saı bolady. Ushý-qoný jolaqtary men termınaldy jóndeý jumystary úshin respýblıkalyq bıýdjetten 7 mıllıard teńge bólingen», - dedi «Petropavl qalasynyń halyqaralyq áýejaıy» AQ dırektory Marat Hasenov.
Onyń aıtýynsha, Astana men Almatyǵa reısterdi memleket sýbsıdııalaıdy. Elordaǵa deıingi bılet quny 10 myń teńgeni quraıdy, al Almatyǵa - 18,5 myń teńge.
«Munaımash» zaýytynda Asqar Mamın Qazaqstan ken oryndarynan munaı óndiretin uńǵymalyq shtangili sorǵylar óndirisimen tanysty. Kásiporynnyń josparlyq qýaty - jylyna 10 myń sorǵy. «Zaýyt Qazaqstan naryǵynyń shamamen 80% qamtıdy. TMD elderi naryǵyna shyǵýǵa da tyrysyp jatyrmyz. Sonymen birge, biz «Qazaqstan temir joly» AQ birlesip, terbelisterdi báseńdetkish shyǵaryp jatyrmyz. 2019 jylǵa deıin uzaq merzimdi kelisimshart bekittik. Bul biz úshin jańa baǵyt. Kez kelgen jumysqa kirisýge daıynbyz», - dedi «Munaımash» AQ basqarma tóraǵasy Spartak Pýshkarev.
Zaýyttyń tapsyrystar paketi 2,5 mlrd teńgeni quraıdy. Spartak Pýshkarevtiń aıtýynsha, bul soma ótken jyldan beri bir deńgeıde saqtaýly tur. Qazir zaýyt 90% jáne eki aýysymda jumys isteıdi. QR Premer-Mınıstriniń birinshi orynbasary Asqar Mamınniń Soltústik Qazaqstan oblysyna jumys sapary aıasynda «Green Park» demalys aımaǵyna barý josparlanǵan. Munda oblys ákiminiń orynbasary Ratmır Ahmetov óńirdegi týrıstik salanyń damýy týraly aıtyp berýi dep kútilýde. Sonymen birge, Qyzyljar aýdanyndaǵy «Radýga» JShS-na barý da josparlanyp otyr. 
