Mamın Soltústik Qazaqstan men Mańǵystaý oblystarynda ınfraqurylymdyq jobalarmen tanysty
ASTANA. QazAqparat - QR Premer-Mınıstriniń birinshi orynbasary Asqar Mamın jumys saparymen Mańǵystaý jáne Soltústik Qazaqstan oblystarynda bolyp, «Nurly jol» baǵdarlamasy boıynsha júzege asyrylyp jatqan jobalarmen, Qazaqstan men Reseı arasyndaǵy aımaqaralyq yntymaqtastyqtyń XV forýmyna jáne Kaspıımańy memleketteri basshylarynyń V sammıtin ótkizýge daıyndyq máselelerimen tanysty.
Bul týraly QR Úkimetiniń baspasóz qyzmetinen habarlady.
ІІ kategorııaly «Beıneý - Aqjigit» avtokólik joly jobasy Beıneý aýylynan bastalyp, Ózbekstan shekarasyna deıin 85 shaqyrymǵa sozylǵan. A. Mamın joldy óńirlik mańyzdylyǵy bar ınfraqurylymdyq nysan retinde atap ótti.
«Bul mańyzdy joba Aqtaý men Quryq porttary arqyly Ortalyq Azııa elderinen Kavkaz, Túrkııa jáne Eýropaǵa tranzıttik avtokólik aǵynyn qalyptastyrýǵa yqpal etedi», - dep A. Mamın joldyń qurylysyn sapaly júrgizip, ony belgilengen ýaqytta tapsyrýdy júktedi.
Sondaı-aq, birinshi Vıtse-premer Quryq portynda parom kesheniniń ekinshi kezegi qurylysynyń barysymen tanysty.
A. Mamınge Shyǵys jáne Batys moldarynyń qurylysy, «Kedendik resimdeý aımaǵy» nysany, port damýynyń ekinshi kezeńiniń jaǵalaýdaǵy gıdrotehnıkalyq qurylymdary týraly aqparat berildi. Sonymen qatar, «Quryq - Quryq porty» avtokólik jolyn qaıta qurý jáne parom keshenin paıdalanýǵa berý boıynsha júrgizilip jatqan sharalar týraly habardar etti. 
Qazirgi tańda ekinshi keshen synaq rejıminde iske qosylǵan. Joba júzege asyrylǵannan bastap 476 keme qatynasy júrgizildi, 2,11 mln tonna júk tıeldi, onyń ishinde bıyl 156 keme qatynasy júrgizilip, 634 myń tonnadan astam júk tıeldi.
2018 jyly Kaspııdegi qazaqstandyq port ınfraqurylymynda júkti tıeýdiń jıyntyq kólemi 9 mln tonnadan astam mólsherdi quraıdy. Osy jyldyń birinshi toqsanynda 2,45 mln tonnadan astam júk jóneltildi, bul ótken jyldyń sáıkes merzimimen salystyrǵanda (1,602 mln tonna) 52%-ke artyq.
Sol kúni birinshi Vıtse-Premer aımaqaralyq yntymaqtastyqtyń XV forýmyna daıyndyq aıasynda Soltústik Qazaqstan oblysyna jumys saparymen bardy.
A. Mamın Petropavl qalasynyń halyqaralyq áýejaıynda áýejaıdyń turaq oryndaryn qalpyna keltirý, «Áýejaıǵa kireberis jol» avtokólik jolyn kúrdeli jóndeý jumystarymen tanysty.
Sondaı-aq, Premer-Mınıstrdiń birinshi orynbasary «Nurly jol» baǵdarlamasy boıynsha júzege asyrylyp jatqan «Petropavl - RF shekarasy» ýchaskesindegi jol ótpesin qaıta qalpyna keltirý barysymen tanysty.
Óńirde A. Mamın oqýshylar saraıynyń, «Jas Órken» jańa yqsham aýdanynyń, «Hilton» saýda-qonaq úı kesheniniń, «Qyzyljar» qonaq úıiniń qurylysy barysymen tanysty. Barlyq nysandar 2018 jyldyń qyrkúıek aıynda paıdalanýǵa beriledi.
A. Mamın Petropavlda Qazaqstan men Reseıdiń aımaqaralyq yntymaqtastyǵynyń XV Forýmyna daıyndyq jumystaryn joǵary uıymdastyrýshylyq deńgeıde ótkizýdi tapsyrdy.
