Mamın: Quryq portynyń parom kesheni ekonomıkanyń eksporttyq-tranzıttik áleýetin nyǵaıtady
ASTANA. QazAqparat - Búgin QR Premer-Mınıstriniń birinshi orynbasary Asqar Mamın jumys saparymen Mańǵystaý oblysyna baryp, Quryq portyndaǵy parom kesheniniń qurylysymen tanysty. «Nurly jol» baǵdarlamasynyń jobasyn «Qazaqstan temir joly» UK» AQ júzege asyrýda.
QR birinshi vıtse-premerin Quryq portynyń alǵashqy iske qosý kesheni nysandary qurylysynyń aıaqtalý kezeńi jaıly habardar etti, dep habarlady primeminister.kz.
Ersaı stansasynan Quryq portyna deıin kireberis temir jol ýchaskesine uzyndyǵy 1 shaqyrymnan asatyn rels-shpaldy tor salyndy. Topyraq úıindilerimen shpaldy bekitý jumystary aıaqtaldy. 4,3 mln. m3 kóleminde jerdi oıý jumystary júzege asyryldy. Batys jaqtaǵy qorshaý qurylysy aıaqtaldy. Oǵan 400 myń tonna kesek tas jumsaldy. Kireberistegi arna men port akvatorııasynyń túbin tereńdetý jumystary aıaqtaldy. 10 kVt. syrtqy elektrmen jabdyqtaý jelisi salyndy.
Kótergish-ótpe kópiri turǵyzylýda. Quryq portynyń alǵashqy iske qosý kesheni kelesi jyldyń aıaǵynda paıdalanýǵa engiziledi. «Quryq portyndaǵy parom kesheni Transkaspıı halyqaralyq kóliktik marshrýttyń kólik-logıstıkalyq júıesiniń mańyzdy býyny bolyp tabylady. Ol Qazaqstannyń tranzıttik-kóliktik áleýetin damytýǵa qýatty serpin beredi jáne «Jańa Jibek joly» jobasyn iske asyrýǵa yqpal etetin bolady», - dedi Mámın.
Parom kesheni táýligine 5 paromǵa qyzmet kórsetip, jylyna 1 mln tonna kóleminde júk tasymaldaýdy qamtamasyz etedi.
