Mamın QR Prezıdenti janyndaǵy Sheteldik ınvestorlar keńesiniń otyrysyna daıyndyqty pysyqtady

NUR-SULTAN. QazAqparat - QR Premer-Mınıstri Asqar Mamınniń tóraǵalyǵymen Qazaqstan Respýblıkasy Prezıdentiniń janyndaǵy Sheteldik ınvestorlar keńesiniń aralyq otyrysy ótkizildi, dep jazady primeminister.kz.

Sheteldik ınvestorlar keńesiniń ınvestıtsııalyq saıasatty iske asyrý boıynsha birlesken jumys toptarynyń energetıka, ekologııa jáne munaıgaz salasy, eńbek zańnamasy, adam kapıtalyn damytý jáne sheteldik jumys kúshin tartý máseleleri týraly qyzmeti jóninde «EY» kompanııasynyń Qazaqstan jáne Ortalyq Azııa boıynsha basqarýshy seriktesi E. Dosymbekov, «Adjıp Kaspıan Sı Bı Vı» basqarýshy dırektory N. Aggodjerı, Qazaqstan, Qyrǵyzstan jáne Tájikstanda ótkizý jáne marketıng jónindegi «KNAÝF» dırektory D. Propp baıandady.

Otyrysta Sheteldik ınvestorlar keńesiniń 32-shi plenarlyq otyrysynyń hattamalyq tapsyrmalarynyń iske asyrylý barysy jáne «Shıkizattyq emes eksportty damytý» taqyrybynda 2020 jyly ótetin 33-shi otyrysyna daıyndyq qaraldy.

«Keńestiń aldaǵy plenarlyq otyrysynyń taqyryby asa ózekti. Qazaqstannyń Strategııalyq damý josparyna sáıkes, 2025 jylǵa qaraı biz shıkizattyq emes taýarlar men kórsetiletin qyzmetterdiń eksporty kólemin $41 mlrd-qa deıin jetkizý kórsetkishine qol jetkizýimiz kerek», - dep naqtylady A. Mamın.

Úkimet basshysy aldaǵy besjyldyq kezeńge ınvestıtsııalyq jobalar pýlynyń jalpy kólemi $120 mlrd-qa jýyqty quraıtynyn aıtty. Bazalyq ındýstrııalandyrý, AÓK, kólik, týrızm jáne saýda-sattyq ınvestıtsııalar ósiminiń negizgi draıverlerine aınalady.

Sharaǵa Keńestiń sheteldik músheleriniń turaqty ókilderimen qatar, Úkimet músheleri, «Atameken» UKP jáne «Báıterek» UBH AQ» basshylyǵy qatysty.