Mamın Qazaqstandaǵy alǵashqy modýldi úı qurylysy óndirisin iske qosty
NUR-SULTAN. QazAqparat - QR Premer-Mınıstri Asqar Mamın Nur-Sultan qalasynda «Astana – jańa qala» AEA №1 Indýstrııalyq parkiniń aýmaǵynda salynyp jatqan ModeX modýldi úı qurylysy zaýytyna bardy, dep habarlaıdy QazAqparat primeminister.kz silteme jasap.
Modýldi úı qurylysy – Germanııa, Sıngapýr, Qytaı jáne basqa da elderde qoldanylatyn turǵyn úı salýdyń zamanaýı ozyq tehnologııasyna negizdelgen. Ol ǵımarattardy sapasyna zalal tıgizbeı, onyń ózindik quny men salyný ýaqytyn tıimdi azaıtýǵa múmkindik beredi, bul turǵyn úıdi qazaqstandyqtardyń basym bóligi úshin qoljetimdi etedi. Máselen, taza árlengen 16 qabatty bir kireberisti turǵyn úı ádette 12-18 aı salynatyn bolsa, bul tehnologııamen nebári 4 aıdyń ishinde salyp shyǵýǵa bolady. Mundaı nátıjege modýldik bloktardyń — taza árlengen daıyn bólmelerdiń arqasynda qol jetkiziledi, ıaǵnı, olar konstrýktor bólshekteri tárizdi birtutas bolyp jınaqtalady.
«Qurylys sektory – Qazaqstan ekonomıkasynyń eń serpindi damyp kele jatqan salasy, ósimi 11,5% quraıdy. Bul joba el halqy úshin turǵyn úıdiń qoljetimdiligin arttyryp qana qoımaı, qurylys ındýstrııasynyń damýyna qarqyn berýge múmkindik týdyrady», - dedi QR Premer-Mınıstri zaýyt qyzmetkerleriniń aldynda sóılegen sózinde.
Tolyq qazaqstandyq jergiliktendirýmen jobany BI Group holdıngi iske asyrady, onyń basshysy A. Rahymbaev tanystyrylym ótkizdi. Zaýyt 700-den astam jumys ornyn quryp, jylyna 405 myń sharshy metr turǵyn úı salýǵa múmkindik beredi, bul halyqtyń jumyspen qamtylýyn arttyrýmen qatar, azamattardyń qoljetimdi baspanamen qamtylýyn jaqsartady.
Zaýyttyń birinshi kezegin osy jyldyń 1 jeltoqsanyna deıin, al ekinshi kezegin – 2020 jyly, úshinshi kezegin 2021 jyly paıdalanýǵa berý josparlanǵan. Personaldy daıarlaý úshin qosarly bilim berý júıesi qarastyrylǵan.
Indýstrııalyq nysandy aralaý kezinde Úkimet basshysy keramzıt beton men temir beton buıymdardan jasalǵan modýldi blok-bólmelerdi óndirý tehnologııasymen, onyń ishinde ıntellektýaldy turǵyn úıdiń 100-ge jýyq fýnktsııasyn qamtıtyn «Aqyldy úı» optsııasymen tanysty. Sharaǵa sonymen qatar QR Premer-Mınıstriniń orynbasary J. Qasymbek pen Nur-Sultan qalasynyń ákimi A. Kólginov qatysty.
