Mamın Qaraǵandynyń eski kólikterdi qaıta óńdeý zaýytynda boldy
ASTANA. QazAqparat - QR Premer-Mınıstriniń birinshi orynbasary Asqar Mamın Qaraǵandy oblysyna jumys sapary barysynda «RecyclingCompany» JShS avtokólikterdi qaıta óńdeý zaýytynyń jumysymen tanysty, dep habarlaıdy Qaraǵandy oblysy ákiminiń baspasóz qyzmeti.
Keshen 26-shy shildede «Saryarqa» arnaıy ekonomıkalyq aımaq aýmaǵynda iske qosylǵan bolatyn . Kásiporynnyń Ortalyq Azııa boıynsha balamasy joq. 
Joba 2015-2019-shy jyldarǵa arnalǵan ındýstrıaldy-ınnovatsııalyq damý memlekettik baǵdarlamasy sheńberinde júzege asyrylady. Onyń jalpy quny - 3,4 mlrd teńge. Jyl sońyna deıin balqytý jáne pırolızdik tsehterdiń qurylysyn kózdeıdin jobanyń ekinshi kezeńin aıaqtaý josparlanǵan.
«Qazirgi tańda zaýyt qurylysynyń birinshi kezeńi iske qosyldy. Paıdalanýdan shyqqan kólik quraldaryn jınaý boıynsha belsendi jumystar jasalýda. Avtoqoqysty bizdiń zaýytqa respýblıkamyzdyń túpkir-túpkirinen alyp keledi. Osyǵan deıin 30 myńnan astam mashına qabyldap úlgerdik. Áli de qabyldaý jalǵasýda», - dedi «RecyclingCompany» JShS basqarýshy dırektory Ázimjan Ospan.
«Avtomobılderdi syǵymdap, fraktsııalarǵa bólý jumystary júrgizilip jatyr. Qurylystyń ekinshi kezeńinde balqytý tsehi men pırolızdik óndiris qarastyrylǵan. Búginde qurylǵylardy ornatý júzege asyrylýda, jumystardy tolyqtaı jyl sońyna deıin bitirýdi josparlap otyrmyz.
Paıdalanýdan shyqqan kólikterdiń qaldyqtarynan bolat, alıýmınıı, túrli-tústi metaldardyń qospalary, sondaı-aq rezeńke untaǵy men kómirsýtek óndiriledi. Sonymen qatar zaýyt kásiporyndy jylýmen qamtý úshin óz qajettilikterine jaratatyn jáne satylymǵa qoıatyn peshke qajetti janarmaı shyǵara bastaıdy. 
Kásiporyn basshylyǵynyń málimdeýinshe zaýyt jylyna 40 myńnan astam eski mashınalardy qaıta óńdeýge qaýqarly. Ónim el ishinde satylatyn bolady.
«Satý naryǵy bar. Qazir zaýyt testilik rejımde jumys istep jatyr. Ónimdi satý boıynsha biz áleýetti tutynýshylarmen kelissózder júrgizip jatyrmyz», - dedi Ázimjan Ospan.
Asqar Mamın jobanyń mańyzdylyǵyn atap ótti jáne de Úkimet tarapynan jan-jaqty qoldaý kórsetiletinin jetkizdi. 
Sonymen qatar birinshi vıtse-premer «Saryarka» AEA-ty jańa óndiris oshaqtarymen toltyrý týraly baıandamany tyńdady. Qazir munda alty kásiporyn jumys istep jatyr. Taǵy alty joba aldaǵy ýaqytqa josparlanyp otyr. Taǵy onǵa tarta oryn bos.
Sonymen qatar aımaqtaǵy júzege asyrylyp jatqan negizgi jobalar tanystyryldy. Olardyń qatarynda baıytý kombınaty, Dore altyn kesekterin óndiretin zaýyt, qýattylyǵy 100 MVt kún elektr stantsııasynyń qurylysy, kondıterlik fabrıkany jańǵyrtý, barıttik rýdany qaıta óńdeý kesheni jáne t.b.
Barlyǵy oblysymyzda shamamen 100 taýashaly jobalar ázirlengen, jáne onyń tórtten bir bóligin «Saryarqa» AEA aýmaǵynda júzege asyrý josparlanyp otyr.
«Jalpy sońǵy 8 aı qorytyndysy boıynsha biz oblysta óndiris ósimi 4,7%-ǵa ulǵaıǵanyn kórip otyrmyz. Bul ortasha respýblıkalyq deńgeıden tómen, alaıda ol da jaman kórsetkish emes», - dedi Asqar Mamın.
