Mamın EO-men ınvestıtsııalyq yntymaqtastyq jónindegi dıalogtyń IV otyrysyn ótkizdi

NUR-SULTAN. QazAqparat - QR Premer-Mınıstri Asqar Mamın ınvestıtsııalyq yntymaqtastyqty odan ári damytý máseleleri jónindegi dıalog alańy aıasynda Eýropalyq odaqqa múshe memleketterdiń dıplomatııalyq mıssııalarynyń basshylarymen kezekti kezdesýdi ótkizdi, dep habarlaıdy QazAqparat Úkimet basshysynyń baspasóz qyzmetine silteme jasap.

QR Premer-Mınıstri Asqar Mamın Tuńǵysh Prezıdent – Elbasy Nursultan Nazarbaev pen Memleket basshysy Qasym-Jomart Toqaev Eýropalyq odaq elderimen ornaǵan yntymaqtastyqqa asa kóńil bóletinin atap ótti.

«EO – Qazaqstannyń basty ınvestorlarynyń biri jáne iri saýda seriktesi. 2019 jyldyń 9 aıynda QR ekonomıkasyna túsken tikeleı sheteldik ınvestıtsııalar aǵyny $8,7 mlrd deıin 15,8%-ǵa artty», — dedi A. Mamın.

Úkimet basshysy bıyl 1 naýryzda QR–EO arasyndaǵy Keńeıtilgen seriktestik pen yntymaqtastyq týraly kelisimniń (KSYK) kúshine enýi Qazaqstan–Eýropa qatynastaryndaǵy sapaly jańa kezeńniń bastalýyn bildiretinin atap ótti. Qujat saýda, ınvestıtsııalar, ınnovatsııalar jáne ınfraqurylymdyq damýdy qosa alǵanda, qyzmettiń 29 salasyn qamtıdy.

A. Mamın Eýropalyq odaqtyń elshilerin Qazaqstannyń EO-men saýda-ekonomıkalyq jáne ınvestıtsııalyq yntymaqtastyǵyna járdemdesý boıynsha ashyq ári belsendi dıalogty odan ári jalǵastyrýǵa shaqyrdy.

Óz kezeginde, dıplomatııalyq mıssııalardyń basshylary Qazaqstanda bıznesti júrgizý úshin qolaıly jaǵdaı jasaý jumystarynyń oń qarqynyn atap ótti.

«Qazaqstan «Doing Business» reıtınginde turaqty progreske qol jetkizýde jáne ınvestıtsııalyq ahýal men iskerlik ortany odan ári jaqsartý úshin zor áleýetke ıe. Munda Qazaqstannyń EO-men ınvestıtsııalyq yntymaqtastyǵy jónindegi dıalog úlken ról atqarady», — dedi QR-daǵy EO ókildiginiń basshysy Sven-Olov Karlsson.

Taraptar QR Prezıdenti Q. Toqaevtyń Brıýssel qalasyna aldaǵy saparyna daıyndyqty, KSYK iske asyrý boıynsha qazaqstandyq tarap ázirlegen jol kartasyn, sondaı-aq QR-da ınvestorlardy sybaılas jemqorlyqqa qarsy súıemeldeý jáne salyq saıasaty máselelerin talqylady.

Kezdesýge Avstrııa, Belgııa, Germanııa, Frantsııa, Nıderlandy, Polsha, Ispanııa, Estonııa, Italııa, Latvııa, Lıtva, Grekııa, Ispanııa, Horvatııa, Rýmynııa, Slovakııa, Majarstan, Fınlıandııa, Shvetsııa elshileri, Portýgalııa, Bolgarııa, Chehııa, sondaı-aq iri eýropalyq kompanııalardyń ókilderi qatysty.

Bıyl sáýir aıynda ótetin Qazaqstannyń EO-men ınvestıtsııalyq yntymaqtastyǵy jónindegi dıalogtyń kelesi otyrysynda KSYK júzege asyrý boıynsha naqty qadamdardy, QR-nyń jasyl ekonomıkaǵa kóshý máselelerin jáne osy jyldyń maýsym aıynda Nur-Sultan qalasynda ótetin DSU XII Mınıstrler konferentsııasyna daıyndyq máselelerin talqylaý josparlanǵan.