Mamın tsıfrlyq tehnologııa arqyly koronavırýspen aýyrǵandardy qadaǵalaýdy tapsyrdy

NUR-SULTAN. QazAqparat – Asqar Mamın tsıfrlyq tehnologııalardy paıdalana otyryp koronavırýspen aýyrǵandardy, baılanysta bolǵan adamdardy qadaǵalaýdy tapsyrdy, dep habarlaıdy QazAqparat tilshisi.

QR Premer-Mınıstri Asqar Mamınniń tóraǵalyǵymen QR aýmaǵynda koronavırýs ınfektsııasynyń taralýyna jol bermeý jónindegi Vedomstvoaralyq komıssııanyń (VAK) selektorlyq otyrysy ótti. Otyrysta Premer-Mınıstr birqatar mınıstrlikke tapsyrma berdi.

«Densaýlyq saqtaý mınıstrligine ótkizý pýnktterinde sanıtarlyq-epıdemıologııalyq talaptardyń saqtalýyna qatań baqylaýdy qamtamasyz etý, bir apta merzim ishinde jeke qorǵanysh quraldarynyń baǵasyn tómendetý jóninde sharalar qabyldaý, Tsıfrlyq damý, ınnovatsııalar jáne aeroǵarysh ónerkásibi mınıstrligimen birlesip, tsıfrlyq tehnologııalardy paıdalana otyryp, baılanysta bolǵan adamdardy, aýyrǵandardy qadaǵalaý, sýbektilerdiń sanıtarlyq talaptardy saqtaýyna monıtorıng júrgizý boıynsha baǵdarlamalardy engizý jóninde qajetti sharalar qabyldaý tapsyryldy», delingen habarlamada.

Eske sala ketsek, ekinshi toqsannan bastap 300-ge deıin oqýshysy bar mektepter dástúrli formatqa aýysady. Sondaı-aq meshitterde bes ýaqyt namaz oqýǵa ruqsat berildi.