Mamın Atyraý jáne Jambyl oblystary ákimderiniń orynbasarlaryna sógis jarııalaý usynysyn qoldady
NUR-SULTAN. QazAqparat – Memlekettik organdardyń birinshi basshylary jetekshilik etetin ekonomıka salalarynda josparly kórsetkishterge qol jetkizý boıynsha jumysty jalǵastyrýy kerek. Bul týraly Úkimet otyrysynda bıylǵy qańtar-naýryz aıyndaǵy áleýmettik-ekonomıkalyq damýdy talqylaý kezinde QR Premer-Mınıstri Asqar Mamın málim etti, dep habarlaıdy QazAqparat tilshisi
«Bıylǵy jylǵy qańtar-naýryz qorytyndylary boıynsha 7 negizgi kórsetkishtiń ishinde altaýy boıynsha Almaty jáne Shyǵys Qazaqstan oblystarynda áleýmettik-ekonomıkalyq damýdyń ósýi baıqaldy. 7 negizgi kórsetkishtiń ishinde beseýi boıynsha alty óńirde ósý baıqaldy. Bul – Aqmola, Aqtóbe, Jambyl, Qaraǵandy, Qostanaı oblystary men Shymkent qalasy», - dedi Úkimet basshysy.
Onyń aıtýynsha, jeti óńir boıynsha 4 kórsetkish boıynsha oń dınamıka baıqaldy. Bul – Atyraý, Qyzylorda, Pavlodar, Túrkistan, Soltústik Qazaqstan oblystary men Nur-Sultan, Almaty qalalary.
«Budan basqa, áleýmettik mańyzy bar taýarlar baǵalarynyń ósýine jol bergeni úshin Atyraý jáne Jambyl oblystary ákimderiniń jaýapty orynbasarlaryna qatań sógis jarııalaý jónindegi Álıhan Ashanulynyń usynysyn qoldaımyn», - dedi A. Mamın.
«Barlyq óńirler áleýmettik-ekonomıkalyq damýdyń josparlanǵan kórsetkishterine qol jetkizýdi jáne Memleket basshysy qoıǵan mindetterdi tıimdi iske asyrýdy qamtamasyz etýi kerek. Memlekettik organdardyń birinshi basshylary jetekshilik etetin ekonomıka salalarynda josparly kórsetkishterge qol jetkizý boıynsha jumysty jalǵastyrýy qajet. Jalpy Qazaqstannyń ekonomıkasy jahandyq ekonomıkalyq daǵdarystyń eleýli áserine qaramastan, kórsetkishterdiń birtindep ósýin kórsetip otyr», - dedi Premer-Mınıstr.
Budan buryn habarlanǵandaı, QR Premer-Mınıstriniń birinshi orynbasary Álıhan Smaıylov Atyraý men Jambyl oblystarynda áleýmettik mańyzy bar azyq-túlik baǵasy qymbattap ketkenin aıtty.
«Osyǵan baılanysty, osy jumysqa jaýapty Atyraý oblysy ákiminiń orynbasary Nurlybaev Qaırat Esqabylulyna jáne Jambyl oblysynyń ákiminiń orynbasary Nyǵmashev Berik Bolatulyna qatań sógis berýdi tıisti oblys ákimderine tapsyrýdy suraımyn», - dedi Álıhan Smaıylov Premer-Mınıstr Asqar Mamınge.
