Mamın «Astana» halyqaralyq qarjy ortalyǵyn damytý máseleleri týraly keńes ótkizdi
NUR-SULTAN. QazAqparat - QR Premer-Mınıstri Asqar Mamın «Astana» halyqaralyq qarjy ortalyǵynyń alańynda Ortalyqty odan ári damytý máseleleri boıynsha jumys keńesin ótkizdi, dep habarlaıdy primeminister.kz.
Keńes barysynda qarjy naryǵyn damytý jáne elimizdiń bırja naryǵy ınfraqurylymy, qarjy ortalyǵynyń jumysy retteıtin zańnamany jetildirý máseleleri qaraldy.
AHQO basqarýshysy Qaırat Kelimbetov qarjy ortalyǵy jalpy qoldanystaǵy 42 aktini (esk. - aǵylshyndyq quqyq negizinde), sondaı-aq quqyqtyq bazanyń ashyqtyǵy men «jınaqylyǵyn» qamtamasyz etetin qarjy qyzmetterin retteý boıynsha 27 aktini qabyldanǵanyn habarlady. Sonymen qatar, sottaǵy, sotqa deıingi daýlardyń sheshilý tıimdiligi men jyldamdyǵyn arttyrý maqsatynda aǵymdaǵy jyldyń aqpan aıynda AHQO soty men Halyqaralyq arbıtraj ortalyǵy eJustice sot tóreligi júıesin resmı túrde iske qosty. Bul júıe Nur-Sultan qalasynda naqty bolmaı-aq álemniń kez kelgen túkpirinen elektrondy formatta talaparyz berýge múmkindik týdyrady.
Búgingi tańda AHQO-ynda 150 qatysýshy tirkelgen, jyl sońyna deıin bul sandy 250-ge jetkizý josparlanǵan.
Talqylaýǵa sonymen qatar Premer-Mınıstrdiń birinshi orynbasary - qarjy mınıstri Á. Smaıylov, ádilet mınıstri M. Beketaev, syrtqy ister mınıstriniń birinshi orynbasary M. Tileýberdi, ulttyq ekonomıka mınıstriniń birinshi orynbasary A. Jumabekov, QR ındýstrııa jáne ınfraqurylymdyq damý vıtse-mınıstri B. Qamalıev, sonymen qatar Ulttyq bank tóraǵasynyń orynbasary E. Birtanov qatysty.
Keńes qorytyndysy boıynsha QR Premer-Mınıstri Asqar Mamın aımaqtyq qarjy ortalyǵyna aınalýy tıis AHQO-ny odan ári damytý boıynsha naqty tapsyrmalar berdi.
«Bizdiń basymdyǵymyz - AHQO-ny damytý. Memleket onyń damýy jáne tabysty jumys isteýi úshin barlyq jaǵdaılardy jasap jatyr», - dedi A. Mamın.
Keńeste sheteldik ınvestıtsııalardyń aǵymyn arttyrý, jańa halyqaralyq áýe baǵyttaryn ashý, qarjy salasyndaǵy zańnamaǵa ózgerister engizý máseleleri qaraldy.
