Mámı Tasmaǵambetovtiń gıtaramen qalaı án aıtqanyn eske aldy
ASTANA. QazAqparat - QR Konstıtýtsııalyq keńesiniń tóraǵasy Qaırat Mámı el astanasyn aýystyrý kezinde Imanǵalı Tasmaǵambetovpen jáne Tólegen Muhamedjanovpen bir páterde qalaı turǵanyn eske aldy.
QR Prezıdentiniń Teleradıokesheni «Osnovanıe Astany: Peredıslokatsııa» atty jańa derekti fılmniń jaryqqa shyǵatynyn jarııalaǵan bolatyn, dep habarlaıdy «QazAqparat» HAA tilshisi. Derekti fılmniń Feısbýkte jarııalanǵan shaǵyn bóliginde Qaırat Mámı elorda aýysqan alǵashqy jyldar týraly esteligimen bólisedi.
«Aıta keterligi, bizdiń bárimiz de ishpeıtin adamdarmyz. Alyp bara jatqan kóńil kóterýler bolmaıtyn. Shyǵarmashyl eki adammen birge turyp, jolym boldy. Tólegen Muhamedjanov roıalde otyryp, ózi jazǵan týyndylaryn oryndap otyratyn. Imanǵalı gıtarada án aıtatyn. Kóp jaǵdaıda men tyńdarman edim», - deıdi Qaırat Mámı fılmniń avtoryna bergen suhbatynda.
Sondaı-aq QR Prezıdenti Ákimshiliginiń basshysy Ádilbek Jaqsybekov Nursultan Nazarbaevtyń qalaısha Astananyń shetinde batpaq keshkizip qoıǵanyn eske aldy .
