Mamandyqtyń jaqsy-jamany joq – traktorshy Bıbigúl Ábisheva
QYZYLORDA. QazAqparat - Qyzylordalyq eńbek ardageri Bıbigúl Ábisheva kezinde tehnıkany sheber meńgerip, sharýashylyqta traktor tizgindegen. Búginde jetpis jasqa jaqyndaǵan ol áli de traktordy ornynan qozǵap, kókeıge túıgenin izbasarlarymen bólisip turady, dep habarlaıdy QazAqparat tilshisi.
Qazir zeınet demalysyna shyqqan keıýana eńbek jolyn Jalaǵash aýdanyndaǵy Kommýnızm (qazirgi Móráli Shámenov aýyly) sharýashylyǵynda bastaǵan. Aýdandaǵy ýchılışede tálim alǵan ony sharýashylyq basshysy M. Shámenov jumysqa shaqyrady.
«Biz ýchılışeni 1969 jyly jeti qyz bitirgen edik. Sharýashylyq basshysy Móráli aǵamyz bizge eńbek etýge usynys bildirdi. Qyrman basyna kelgende birneshe traktor tizilip tur eken. Meniń enshime túri jańalaý kóringen traktor tıdi. Osylaısha eńbek jolym bastalyp ketti», - deıdi eńbek ardageri.
Sodan bergi jyldarda ol ózine mindettelgen tapsyrmaǵa úlken jaýapkershilikpen qaraı bildi. Astyqty shashpaı-tókpeı jınap alýǵa barynsha kúsh salatyn. Aǵa býyn ókilderi jas qyzdyń jankeshti eńbegine joǵary baǵasyn beretin edi.
Beride turmys qurǵannan keıin Qarmaqshy aýdany Jańajol aýylyna qonys aýdardy. Munda da eńbek kórigin qyzdyryp, sharýashylyqtyń tolaǵaı tabysqa kenelýine zor úlesin qosty. 1975 jyly «Shalqar» komsomol jastar brıgadasyn quryp, mal sharýashylyǵynda eńbek etti. Odan keıin qaıtadan óziniń mehanızatorlyq kásibine oralyp, traktor rýlin tizgindedi.
«Qazir tehnıkanyń túri de kóp qoı. Shetelden kelgen kóptegen traktormen kombaındardy kórýge bolady. Bizdiń kezimizde negizinen reseılik tehnıkalardy paıdalanyp keldik», - deıdi eńbek ardageri.
Aýyldastarynyń aıtýynsha, traktorshy Bıbigúl táýligine 80-90 tonnaǵa deıin astyq tasymaldap, el-jurttyń aldynda úlken abyroıǵa kenelgen. Keńes odaǵy jáne Qazaqstan joǵary keńesine delegat bolyp saılandy.
«Jalpy, kásiptiń jaqsysy-jamany joq. Óz mamandyǵyńa qurmettep, qyzyǵa jumys isteıtin bolsań, odan abyroıǵa kenelýge negiz bar», - deıdi ol.
Bıbigúl Ábishevanyń joldasy – Kárıman Sadyqov ta kezinde sharýashylyqta mehanızator bolyp eńbek etken. Ekeýi urpaq ósirip, olarǵa sanaly tárbıe berebildi.
