Mamandyqtar reıtıngi qalaı jasalady

ASTANA. QazAqparat - Osy ýaqytqa deıin «Atameken» ulttyq kásipkerler palatasy 33 mamandyq boıynsha 784 oqý baǵdarlamasyn saraptap, ýnıversıtetterdiń reıtıngisin jasap shyǵardy. Basty kórsetkishter - túlekterdiń jumysqa turýy men ortasha jalaqy kólemi. Qazirdiń ózinde mektep túlekteri qaı ýnıversıtetti bitirgennen keıin jumysqa turý múmkindigi joǵary bolatynyn kóre alady, dep xabarlaıdy QazAqparat tilshisi.

«Atameken» UKP Adamı kapıtaldy damytý departamentiniń sarapshysy Aınur Ybyjanovanyń aıtýynsha, jyldyń aıaǵyna deıin 2 myń oqý baǵdarlamasynyń tıimdiligin zerdelep shyǵý josparlanǵan.

«Qazir biz 33 mamandyqtyń reıtıngin jarııaladyq. «Atamekenniń» resmı saıtyna kirseńiz, «Oqý baǵdarlamalarynyń reıtıngi» degen bólim bar. Sonyń ishinde 33 mamandyqtyń tizimi berilgen. Máselen, «Avtomattandyrý jáne basqarý» degen mamandyqty ashsańyz, 26 joǵary oqý ornynyń tizimi shyǵady. Biz sonyń bárin zerdelep, ýnıversıtetterdi maman daıarlaýdyń tıimdiligi boıynsha ornalastyrdyq. Osylaısha, árbir mamandyq boıynsha joǵary oqý oryndarynyń reıtıngi ázirlendi. Zertteý kezinde jumysqa ornalasqan túlekterdiń paıyzy men olardyń ortasha eńbekaqysy, oqý baǵdarlamasynyń ózektiligine basa nazar aýdaryldy. Budan bólek, túlekterdiń arasynda saýalnama da júrgiziledi. Olar da joǵary oqý ornynda alǵan bilimniń qanshalyqty paıdaly bolǵanyn aıtady», - dedi A.Ybyjanova QazAqparat tilshisine bergen suxbatynda.

Onyń sózine qaraǵanda, reıtıngti ázirleý sharalary eki kezeńnen turady. Birinshi kezeńde QR Bilim jáne ǵylym mınıstrliginen tıisti málimetter alynady. Sonyń negizinde byltyrǵy túlekterdiń jumysqa ornalasý paıyzy men ortasha eńbek aqysyna, professor-oqytýshylar quramynyń tájirıbesine, bilim berý baǵdarlamalaryna salynǵan ınvestıtsııalarǵa, jumys berýshimen birge ázirlegen bilim berý baǵdarlamalaryna, sondaı-aq, halyqaralyq akkredıtatsııaǵa saraptama júrgiziledi.

Ekinshi kezeńde salalyq sarapshylar bilim berý baǵdarlamalarynyń mazmundyq alshaqtyǵyn taldap shyǵady. «Máselen, túlekter men olardyń jumysqa ornalasýy týraly málimetter Joǵary bilimdi basqarýdyń biryńǵaı júıesinen alynady. Sosyn biz onyń bárin Bilim jáne ǵylym mınıstrligi bergen málimettermen salystyramyz», - dep atap kórsetti A.Ybyjanova.

Aıta ketken jón, mamandyqtar reıtıngi - «Atameken» UKP-nyń bastamasy. Negizgi maqsat - jumys berýshi men joǵary oqý orynnyń arasyndaǵy baılanysty nyǵaıtý. Sebebi búginde teorııa men praktıkanyń alshaqtyǵy bar. Sonyń saldarynan joǵary oqý ornyń bitirgen jastar jumys taba almaı jatady. Al jumys berýshilerge jas mamandardy qaıta daıarlaýǵa týra keledi. Oǵan da biraz ýaqyt ta, qarajat ta ketedi.

«Negizi, shetelde ata-analar men mektep túlekteri osy ispetti reıtıngterdi muqııat baqylap otyrady. Sebebi ýnıversıtettiń oqý baǵdarlamasy myqty bolsa, ony oqyp shyqqannan keıin jaqsy jumys ta, joǵary jalaqy da bolady», - deıdi A.Ybyjanova.