«Mamandyqtar álemine jol ashamyz» forýmyna elimizdiń ár óńirinen 160 oqýshy keldi
ASTANA. QazAqparat - Búgin Astanada bastalǵan «Mamandyqtar álemine jol ashamyz» atty forýmǵa elimizdiń túkpir-túkpirinen kelgen 160 oqýshy qatysýda. Shara M. Ótemisov atyndaǵy oqýshylar saraıynda ótip jatyr.
«Biz búgin «Mamandyqtar álemin ashamyz» atty tuńǵysh forýmǵa qatysyp otyrmyz. Sharaǵa ár oblystan 7-11 synyptardyń 10 oqýshysynan keldi. Olardyń árqaısysy oblystyq synaqtan súrinbeı ótkender. Sondyqtan, búgin Astanaǵa ár oblystyń eń úzdik oqýshylary keldi deýge bolady. Forýmnyń basty maqsaty balalarǵa bolashaq mamandyǵyn tańdaýda jol kórsetip, baǵyt-baǵdar berý», - dep atap ótti QR BǴM Respýblıkalyq qosymsha bilim berý ortalyǵynyń ǵylymı-tehnıkalyq, ekologııalyq-týrıstik baǵytynyń jetekshisi Dinmuhammed Qalıev. Onyń aıtýynsha, búgingi zaman talaby boıynsha balalar óziniń bolashaq mamandyǵy týraly mektep partasynda otyryp-aq bilýi tıis. «Eger biz balalardy bolashaq mamandyǵyn durys tańdaýǵa baýlı alsaq, olar mektep bitirgen kezde qandaı mamandyqty tańdaý kerek ekenin, qoǵamda qandaı oryn alatynyn, sondaı-aq týǵan eliniń damýyna qandaı úles qosa alatynyn anyq biletin bolady. Bul forým bıyl birinshi ret ótkizilip, biraq biz ony eki jylda bir ret ótkizip turý josparda bar», - dedi ol. Forým baǵdarlamasynda «Bolashaq mamandyqqa qadam» respýblıkalyq kórmesi, «Mamandyq tańdaıtyn kez keldi» respýblıkalyq konkýrsy jáne basqa da saıystar men is-sharalar qarastyrylǵan.
