Mamandyǵy joq qandastar Qazaqstanǵa beıimdeý ortalyqtary arqyly kóshedi

ASTANA. QazAqparat – Kóshi-qon komıteti tóraǵasynyń mindetin atqarýshy Іlııas Ispanov BAQ ókilderine qandastardyń kóship kelýindegi jańashyldyqtar týraly aıtyp berdi, dep habarlaıdy QazAqparat tilshisi.

«Endi qandastar shetelde otyryp, «bir tereze» qaǵıdaty arqyly qonys aýdaratyn óńirdi tańdaıdy. Pavlodar, Qostanaı oblysy sııaqty jumys kúshi tapshy óńirlerden mamandyǵy boıynsha kvota alý múmkindigi bar. Bul jerde joǵary bilim ǵana emes, orta bilim de eskeriledi. Al ońtústik óńirlerdegi jumys kúshi kóp, al jumys orny joq jerge barý úshin óziniń jaǵdaıyn ózi sheshýi kerek bolady. Jumysty ózi taýyp alýy qajet. Ne bolmasa buǵan deıin kóship kelgen týysqandarymen qosylý máselesi bar. Bul baǵytta tetikter kóp. Jańa ǵana Premer-Mınıstr bul máselelerdi elge kelip baryp sheshpeı, kóship kelmeı turyp sheship alatyndaı jaǵdaı jasaý týraly tapsyrma berdi», - dep túsindirdi komıtet basshysy.

Sondaı-aq ol naqty mamandyǵy nemese joǵary bilimi joq, orta nemese jartylaı orta bilimi ǵana bar qandastardyń kóship kelý tártibi qalaı bolatynyn túsindirdi.

«Búgingi usynysty ózderińiz estidińizder. Ol jerde siz ataǵan sanattardaǵy qandastar elge kelmeı turyp beıimdeý ortalyqtarymen baılanysady. Ol jerde, birinshiden, til máselesi. Ekinshiden, saýatyn kóterý jáne qysqa merzimde jumysqa beıimdeý sabaqtaryn nemese kýrstaryn ótedi. Sonyń arqasynda elge kelgen kezde otbasymen birge beıimdelip kóshedi», - dedi Ilııas Ispanov.