Mamandyqty 8-9 synyptan anyqtaý mańyzdy – maman keńesi
ASTANA. KAZINFORM – Bıyl 230 myńǵa jýyq túlek UBT tapsyrady. Sarapshylar mamandyq tańdaýda keshikpeý kerektigin aıtyp, oqýshylar men ata-analardyń basty qatelikterin atady.
– 2022-2023 oqý jylynyń derekterine súıensek, túlekterdiń 60 paıyzy JOO bitirgen soń mamandyǵy boıynsha jumys istemeıdi. Al 87 paıyzy ata-anasynyń nemese muǵalimderiniń yqpalymen mamandyq tańdaıdy, - dedi bilim salasynyń sarapshysy, proforıentolog Damır Samarhanov.
Mamannyń aıtýynsha, qazir kóptegen oqýshy da, ata-ana da eńbek naryǵyndaǵy ózekti mamandyqtardan habarsyz. Sol sebepti mektepterde kásibı baǵdarlaýdy kúsheıtý jumystary júrgizilip jatyr. Elimizde myńnan asa proforıentolog jumys isteıdi, al mınıstrlikter 8 myńǵa jýyq mamandy mektepterge engizip jatyr.
– Balanyń beıimin 8–9 synyptan anyqtaýǵa bolady. Sol kezeńde proforıentologpen jumys istese, 11-synypta mamandyq pen ýnıversıtet tańdaý áldeqaıda jeńil bolady, - dedi ol Jibek Joly telearnasyndaǵy «Bugin LIVE» baǵdarlamasynda.
Sarapshy mamandyq tańdaýda qoldanýǵa bolatyn 4D modelin usyndy:
Dream – arman
Data – qabilet
Demand – naryqtaǵy suranys
Doing – tájirıbe
Bul qadamdardan ótken oqýshy bolashaq baǵytyn anyq ári senimdi tańdaıdy.
Eńbek naryǵynda suranysqa ıe baǵyttardyń qatarynda jasandy ıntellekt, kıberqaýipsizdik, IT, geoaqparattyq júıeler, tehnıka salasy erekshe oryn alyp otyr. Byltyr berilgen 77 myń granttyń 60 paıyzy tehnıkalyq mamandyqtarǵa bólingen.
Aıta keteıik, buǵan deıin UBT-nyń jańa formaty qandaı múmkindik beretinin jazǵan edik.