Mamandyq tańdaýǵa kómek: jańa platformalar iske qosyldy
ASTANA. KAZINFORM – Endi mektep oqýshylary men kolledj stýdentteri mamandyq tańdap, jumys tabýdy erterek úırene bastaıdy. Bul úshin birneshe tsıfrlyq platforma iske qosylyp jatyr. Negizgi maqsat – jastardy eńbek naryǵyna aldyn ala daıyndaý. Bul týraly QR Eńbek jáne halyqty áleýmettik qorǵaý mınıstrligi habarlady.
– «Mansap kompasy» platformasynda jyl saıyn 100 myń bilim alýshyny qamtý josparlanǵan. Onda jalpy bilim beretin mektepterdiń 7–11-synyp oqýshylaryn kásibı dıagnostıkalaý boıynsha jańa fýnktsııa ázirlendi. Platforma stýdentterge kásipter men ózekti jumys oryndary týraly aqparat berip qana qoımaı, sondaı-aq kásiptik dıagnostıka júrgizýge, mansaptyq keńes alýǵa jáne jumys berýshilermen ózara is-qımyl jasaýǵa múmkindik beredi. Bul mamandyqty tıimdi tańdaýǵa jáne túlekterdi jumysqa ornalastyrýǵa yqpal etedi, - deıdi mınıstrlik ókilderi.
Odan bólek, 500 myń oqýshy men tehnıkalyq jáne kásiptik bilim uıymdarynyń stýdentteri úshin «Elektrondyq eńbek bırjasy» biryńǵaı tsıfrlyq platformasy iske qosyldy.
– «Elektrondyq eńbek bırjasy» biryńǵaı tsıfrlyq platformasyn qoldana otyryp, mansap ortalyqtary arqyly jumys izdeýge jáne jumysqa ornalastyrýǵa oqytýdy uıymdastyrý josparlanýda. Bul olarǵa óz rezıýmelerin jiberýge, onlaın rejımde suhbattasýdan ótýge, eńbek sharttaryn jasap úırenýge múmkindik beredi, - deıdi QR Eńbek jáne halyqty áleýmettik qorǵaý mınıstrligi.
Jaýapty mınıstrlik jastardy jumys izdeýge úıretý sharalaryna den qoıyp otyr.
– Іske asyrylyp jatqan jáne iske asyrýǵa josparlanǵan is-sharalar eńbek naryǵynyń zamanaýı talaptaryna jaýap beretin kadrlar daıarlaýdyń tıimdi júıesin qurýǵa múmkindik beredi. Bul is-shara boıynsha jumys bastaldy jáne ol negizgi 3 kezeńnen turady:
Oqýshylar men TjKB stýdentteri úshin jumys izdeý jáne jumysqa ornalasý boıynsha Elektrondyq eńbek bırjasynyń múmkindikteri týraly oqytý materıaldaryn (beınesabaqtar, prezentatsııalar, dárister jáne t.b.) ázirleý;
Oqý materıaldaryn Skills.enbek.kz platformasyna ornalastyrý;
Oqýshylar men TjKB stýdentterin Skills.enbek.kz platformasynda jumys izdeý jáne jumysqa ornalastyrý daǵdylaryna oqytý, - delingen mınıstrliktiń jaýabynda.
Aıta keteıik, oqýshylar men stýdentter Skills.enbek.kz platformasynda jumys izdeýdi, rezıýme toltyrýdy, onlaın suhbattasýǵa qatysýdy, eńbek shartyn jasaýdy úırenedi.
Esterińizde bolsa, buǵan deıin Astanada respýblıkalyq «Jumysshy mamandyqtar qalasy» festıvali ótkenin habarlaǵan edik.