Mamandyq tańdaý: tegin platforma qandaı múmkindik beredi
ASTANA. KAZINFORM — «Mansap kompasy» platformasynda kásip tańdaýǵa qajetti barlyq aqparat bir jerge jınaqtalǵan.
Eńbek jáne halyqty áleýmettik qorǵaý mınıstrligi qazaqstandyqtarǵa «Mansap kompasy» tsıfrlyq platformasynyń múmkindikterin eske salady. Bul platforma oqýshylarǵa, olardyń ata-analaryna jáne eresek azamattarǵa kásip tańdaýǵa, eńbek naryǵynda suranysqa ıe mamandyqtardy bilýge jáne jumysqa ornalasý múmkindikterimen tanysýǵa kómektesedi.
2026 jylǵy 1 qazandaǵy jaǵdaı boıynsha platformada 7-11-synyptarda oqıtyn 34 596 oqýshy kásibı baǵdarlaý testinen ótken. Test nátıjesinde ár oqýshyǵa bolashaqta qaı baǵytta jumys isteýge beıimi bar ekenin anyqtaýǵa kómektesetin jeke usynystar berilgen.
Testileýge eń kóp qatysqan óńir – Qyzylorda oblysy. Munda 22 602 oqýshy test tapsyrǵan. Shyǵys Qazaqstan oblysynda servısti 3 497 oqýshy paıdalansa, Jambyl oblysynda – 2 675, Astanada 2 456 oqýshy ótken.
Mamandyq tańdaý – adam ómirindegi mańyzdy qadamdardyń biri. Óıtkeni ol bolashaqta qandaı bilim alatynyna jáne kásibı turǵyda qalaı damıtynyna áser etedi. Sondyqtan mamandyq tańdaǵanda adamnyń óz qyzyǵýshylyǵy men qabiletin ǵana emes, sol salaǵa qoıylatyn talaptardy, bilim alý múmkindikterin jáne eńbek naryǵyndaǵy jaǵdaıdy da eskergen jón.
«Mansap kompasy» platformasynda kásip tańdaýǵa qajetti barlyq aqparat bir jerge jınaqtalǵan. Munda túrli mamandyqtarmen tanysyp, oqý baǵyttaryn salystyrýǵa jáne bolashaq kásibin sanaly túrde tańdaýǵa bolady.
Platformanyń negizgi quraldarynyń biri – kásibı baǵdarlaý testi. Ol adamnyń qandaı mamandyqtarǵa qyzyǵatynyn jáne qaı salaǵa beıimi bar ekenin anyqtaýǵa kómektesedi. Test nátıjesi boıynsha paıdalanýshyǵa ózine qolaıly baǵyttar usynylady. Osylaısha, oqýshylar ózderiniń myqty tustaryn jaqsyraq túsinip, qabileti men qyzyǵýshylyǵyna saı keletin mamandyqtardy anyqtaıdy.
Testileýden bólek, platformada mamandyqtar, qajetti daǵdylar jáne bilim alý múmkindikteri týraly aqparat bar. Paıdalanýshylar salaǵa, óńirge jáne jalaqy deńgeıine qaraı qarastyra alady. Sondaı-aq tańdaǵan mamandyǵyn qaı oqý ornynda meńgerýge bolatynyn da biledi.
Bul servıs ásirese oqýshylar men ata-analar úshin paıdaly. Mamandyqtardy birge zertteý arqyly bolashaq mamandyqtyń túrli nusqalaryn talqylaýǵa, ár mamannyń nemen aınalysatynyn, qandaı bilim men daǵdy qajet ekenin jáne ony qaıdan alýǵa bolatynyn bilýge bolady.
Aıta keteıik, kásibı baǵdarlaý testiniń nátıjeleri usynymdyq sıpatqa ıe. Sondyqtan kásipti túpkilikti tańdaǵanda adamnyń jeke qyzyǵýshylyǵy men qabiletin, bilim alý múmkindikterin jáne qajetti daǵdylardy meńgerýge daıyndyǵyn eskerý mańyzdy.
«Mansap kompasy» eresek azamattarǵa da qoljetimdi. Máselen, qyzmet salasyn ózgertkisi keletin, jańa mamandyq meńgerýdi nemese kásibı damýynyń kelesi baǵytyn anyqtaýdy josparlaǵan adamdar platformany paıdalana alady.
Osylaısha, «Mansap kompasy» túrli mamandyqtarmen tanysyp qana qoımaı, bilim alý men mansap jolyn josparlaýǵa qajetti aqparat alýǵa múmkindik beredi.
Tsıfrlyq platformany mansap.enbek.kz saıty arqyly tegin paıdalanýǵa bolady.
Qazaqstanda qaı mamandyq ıeleri jumyssyz qalmaıtyny týraly jazǵan edik.
