Mamandyǵyńdy jaqsy kórseń, alynbaıtyn qamal joq – Saǵynysh Nazkenov
PETROPAVL. KAZINFORM – Bilim berý salasynda, sonyń ishinde mektepke deıingi bilim berý mekemelerinde erlerdiń úlesi tym az. Máselen, Soltústik Qazaqstan oblysyndaǵy osyndaı 449 mekemede úsh myńǵa jýyq pedagog bolsa, sonyń 172-si ǵana er adam. Tórt-aq er adam tárbıeshi bolyp jumys isteıdi. Sodan da bolar, búldirshindermen erteńgilikte bılep júrgen jigittiń jelidegi beınerolıgi kópti súısintti. 23 jastaǵy Saǵynysh Nazkenov «Batyr» balabaqshasynda mýzyka pániniń muǵalimi.
— Saǵynysh Rýslanuly, sizdiń balabaqsha búldirshinderimen bılep jatqan vıdeońyz áleýmettik jelide tarady. Bul qashan bolǵan edi, bıdi siz úırettińiz be?
— «Aqshaqar» dep atalady án. Jańajyldyq erteńgilikke daıyndaǵan bıimiz. 1,5 aı boıy qyzdarmen kim qaı jerde turady, kim kimnen keıin shyǵady, bıdiń qozǵalystaryn qaıtalap, jattyqtyq. Ózim buryn múlde bılemegenmin. Biraq balalarmen jumys istegesin bárin bilýiń kerek. Qazir birge án de jattaımyz, bıleımiz de.
Al jumys sátiniń áleýmettik jelige taraǵanyn anam aıtyp, kórsetti. Tań qalǵanym ras. Oqyrmandar áli de qoldaý kórsetip jatyr.
— Bul mamandyqqa qalaı kelip júrsiz?
— Bala kezimnen muǵalim bolýdy armandadym. Keıin M.Jumabaev atyndaǵy joǵary kolledjdi mýzyka pániniń muǵalimi mamandyǵy boıynsha bitirdim. Dombyrada, fortepıanoda oınaımyn. Ápkem de ustaz. Qazaq tili jáne ádebıeti pániniń muǵalimi bolyp eńbek etedi.
— Búldirshindermen jumys istegen qıyn emes pe? Bul jumystyń ereksheligi nede?
— Balabaqshada jumys istep jatqanyma bıyl ekinshi jyl. Az-muz tájirıbem bar. Jaqsy ujymǵa tústim, áriptesterim únemi qoldap, aqyl-keńesterin aıamaıdy. Eń bastysy — maǵan balalarmen jumys istegen unaıdy. Al istegen isiń unaǵanda eshqandaı qıyndyq kedergi bola almaıdy.
Mektepke deıingi kezeńde tárbıeniń negizi qalanady, ıaǵnı mýzykaǵa degen qyzyǵýshylyqty oıatyp, shyǵarmashylyq qabiletterin damytýǵa mindettimiz. Sabaqta án aıtý daǵdylaryn damytamyz, mýzykalyq mádenıetti úırenemiz.
Merekelerge daıyndyq kóp ýaqytty alady. Biraq, meniń oıymsha, osyndaı daıyndyqtar, jańa án, bı úırený balalarǵa unaıdy.
Bir topta jıyrma shaqty bala bar. Jumys isteý ońaı emes, alaıda tárbıeshiler úlken kómek kórsetedi.
— Qyzyqty oqıǵalar jıi bolyp turatyn shyǵar?
— Árıne, erkeleıdi. Biri jańalyǵymen bóliskisi keledi, endi biri án aıtqysy kelmeı, oınaıdy. Uıalshaq balalar bar. Árqaısysynyń tilin tabýǵa tyrysamyn.
— Kolledji sizben birge neshe jigit bitirdi, olar mamandyq boıynsha jumys istep jatyr ma?
— Topta qyzdardyń arasynda jeti jigit boldyq, qazir solardyń menen basqa ekeýi ǵana mamandyq boıynsha jumys istep jatyr. Kópshiligi basqa salaǵa ketti, oqýyn ári qaraı jalǵastyrǵandar bar. Al men bul salada jumysymdy jalǵastyramyn, bolashaǵymdy tek osy mamandyqpen kóremin.
Buǵan deıin sheteldik fılmderge qazaqsha dýblıaj jasap júrgen petropavldyq boıjetken týraly jazǵan edik.