Mamandyǵymyzdyń jaýapty ekenin uǵynamyz — qyzylordalyq qutqarýshy
QYZYLORDA. KAZINFORM — Qyzylordalyq qutqarýshy Qaırat Qydyrálıuly Kenjebaev 22 jyldan beri tótenshe jaǵdaılar salasynda qyzmet atqaryp keledi. Uzaq jyldar boıy óz salasynda mol tájirıbe jınaqtaǵan qarapaıym eńbek adamy búginde Atyraý oblysynda halyqty sý tasqynynan qutqarý baǵytynda ýaqytpen sanaspaı eńbek etip júr. Tájirıbeli maman tótenshe jaǵdaı kezinde jumystyń durys úılestirilýi jáne ujymnyń aýyzbirshiligi asa mańyzdy ekenin aıtady.
«Qandaı jaǵdaı bolmasyn, el amandyǵy úshin kez-kelgen jaǵdaıda kómek kórsetýge daıynbyz. Qyzmetke qabyldanǵan alǵashqy sátten bul salanyń jaýapty ekenin uǵynyp kelemiz. Tájirıbeli qutqarýshyǵa tán qasıetterdi ıgerýge kóńil bóldik. Mamandyqtyń qyr-syryn úırenýge kóńil bóldik. Árıne, mamandyǵymyz qaýipti ekenin ras. Dese de árbir sátte janqııarlyq áreketpen adam ómirin saqtaýǵa kóńil bólemiz. Bul bizdiń ómirlik ustanymymyzǵa aınalǵan. Sondaı-aq, tabıǵı jáne tehnogendik sıpattaǵy apat saldarynan zardap shekken turǵyndar men olardyń mal-múlkin qutqarýǵa nazar aýdaramyz. Bıyl bul baǵytta elimizdiń birneshe oblysynda jumys jasadyq. Árbir sátte halyqtyń alǵysyna ıe bolý abyroıly jáne er azamatqa laıyqty qyzmet ekenin uǵynamyz. Sondyqtan da qaı ýaqytta bolmasyn qutqarýshy mamandyǵynyń mártebesi bıik oılaımyn», — dedi ol.
Ol óziniń uzaq jylǵy eńbeginiń arqasynda ІІ dárejeli «Qutqarýshy», «Qutqarý operatsııalaryna belsendi qatysqany úshin», ІІІ dárejeli «Tótenshe jaǵdaılar júıesine eńbegi sińgen qyzmetker» tósbelgisimen marapattalǵan. Sondaı-aq, Tótenshe jaǵdaılar mınıstrliginiń birneshe márte alǵys hatyn ıelengen. Búginde ol 2 aıǵa jýyq Qostanaı, Aqtóbe, Batys Qazaqstan, Atyraý oblystarynda sý tasqynynyń aldyn alý baǵytynda jumystar júrgizip keledi.
«Topan sýdyń aldyn alý jáne joıý kezindegi qajetti tehnıkalarǵa ýaqytyly kútim kórsetilip, olardyń úzdiksiz jumys jasap turýy mańyzdy. Men bala kezden ákem kólik jóndep jatqanda qasynda júrip, qatty qyzyǵatyn edim. Al qazir ózimniń balalarym meniń janymda dál solaı quraq ushyp tehnıka jóndeýge kómek kórsetedi», — dedi ol.
Oblystyq jedel qutqarý jasaǵynda radıatsııalyq-hımııa bólimniń bas qutqarýshy laýazymyn atqaryp kele jatqan kásibı maman 2 ul, 1 qyz tárbıelep otyr. Ol qutqarýshydan joǵary sanatty bas qutqarýshyǵa deıin kóterildi.
