Mamandar JITS-tiń jynystyq jolmen taralýynyń beleń alýyna alańdaýly
ASTANA. QazAqparat - Sońǵy jyldary elimizde JITS-ke shaldyqqandardyń 70 paıyzy aýrýdy jynystyq jolmen juqtyrǵan. Mundaı derekti Astana qalalyq JITS-ke qarsy kúres ortalyǵynyń bas dárigeri Sábıt Ábdiraıymov bildirdi, dep habarlaıdy QazAqparat.
«Elimiz boıynsha jyl saıyn mamyrdyń úshinshi jeksenbisi Halykaralyq JITS qurbandaryn eske alý kúni bolyp belgilengen. Osy dataǵa oraı ortalyǵymyz qala kóleminde kóptegen is-sharalar ótkizdi. Áli de jalǵasyn tabady dep oılaımyz. Biraq, másele ótkizgenimiz jaıynda esep berýde emes, qoǵamǵa, qala turǵyndaryna JITS-tiń aldyn alý, saqtaný joldary jaıynda durys aqparat berý bolyp otyr», - dedi ol BAQ ókilderimen kezdesýi barysynda.
Bas dárgerdiń aıtýynsha, 1997 jyldan beri 1293 adam osy indetti juqtyrýy sebepti ortalyqqa tirkeýge alynǵan. Aǵymdaǵy jyldyń ózinde taǵy 13 adam esepke alynyp otyr. Jalpy sońǵy jyldary bul indettiń jynystyq jolmen taralýy beleń ala túsýde ári er adamdardyń arasynda jıi kezdesedi. Bul kezdeısoq, beıbereket jynystyq qatynasqa túsýdiń saldarynan. Búginde ortalyqtan 321 adam turaqty dári-dármekterin qabyldap, mamandar keńesin alýda.
Kezdesý barysynda bas dáriger tilshilerdi aldaǵy ýaqytta «qaterli dert», «daýasy joq indet» sııaqty jalań statıstıkamen halyqty úrkitip, shoshytpaı kerisinshe utymdy, tıimdi aqparat berýge shaqyrdy.
«Bul tek qana qalalyq ıa bolmasa oblystyq arnaıy ortalyqtardyń atqaryp jatqan jumysymen bitetin dúnıe emes, buǵan qoǵam bolyp atsalyssaq, joıyp jibermesek te ósý qarqynyna tosqaýyl bolar edik», - dedi ol.
