Mamandar jaýyn jaýsa Almaty kóshelerin nelikten sý basatynyn túsindirdi
ALMATY. QazAqparat - Almaty kósheleri jaýyn jaýsa nelikten sý astynda qalatynyn qalalyq Tabıǵı resýrstar jáne tabıǵatty paıdalaný basqarmasynyń mamandary aıtyp berdi, dep habarlaıdy QazAqparat.
Almatylyqtar sınoptıkterdiń jaýyn týraly aqparatyn ádette úlken qobaljýmen qabyldaıdy. Óıtkeni, kósheler demde sýǵa tolyp, jol qozǵalysynda kollaps oryn alady.
«Aryq júıesi merıdıandyq baǵytta ońtústikten soltústikke sekýndyna 0,11-0,22 tekshe metr sý ótkize alady. Al endik baǵytta sekýndyna - 0,05-0,11 tekshe metr. Jol boıyndaǵy aryqtyń dıametri 50 sm. Aryqtar sýarý júıesi ǵana emes, olar sondaı-aq jaýyn sýyn syrtqa aǵyzýǵa arnalǵan. Alaıda, sýdy syrtqa shyǵaratyn júıeniń tolyq jumys istemeýine baılanysty jaýyn sýy túgel aǵyp ketpeıdi. Qatty daýyl turǵanda aryqtardy qoqystar bitep qalady. Saldarynan keı ýchaskelerdi sý alyp ketedi», - dedi basqarma basshysynyń orynbasary Aıdyn Temeshov.
Temeshovtyń sózine qaraǵanda, jaqynda qaladaǵy aryq sýlaryn aǵyzyp jiberetin júıe salynady.
«Jalpy uzyndyǵy 448,5 shaqyrym bolatyn aryq júıesin, sondaı-aq Esentaı ózeninde tazalaý qurylǵysyn ornata otyryp, nóser sýynyń káriz júıesin salý boıynsha jobalaý-smetalyq qujattama ázirleý jóninde 2018-2020 jyldarǵa arnalǵan usynystar daıyndaldy. Bul qurylǵy qaladaǵy jaýyn sýyn ózenge aǵyzyp jiberýge múmkindik beredi. Bul óz kezeginde ortalyq kóshelerdi sý basýynyń aldyn alady», - dedi ol.
Basqarma ókiliniń usynǵan málimetine súıensek, 2010-2016 jyldary jalpy uzyndyǵy 128 shaqyrym bolatyn aryq júıesi salynyp, jóndelgen.
2017 jyly Alataý, Áýezov aýdandarynda uzyndyǵy 14,7 shaqyrym bolatyn, Bostandyq, Medeý aýdandarynda 42 shaqyrym aryq júıeleri salynyp jatyr.
