Mamandar jasóspirimder arasyndaǵy erte júktilik máselesin kóterdi

ASTANA. KAZINFORM – Jynystyq jáne reprodýktıvti densaýlyq jónindegi qazaqstandyq qaýymdastyq OKQ alańynda ótken baspasóz konferentsııasynda erte júktilik máselesin kóterdi.

Osy baǵytta júrgizilip jatqan jumystar týraly Qaýymdastyqtyń atqarýshy dırektory Galına Grebennıkova aıtyp berdi. Onyń sózinshe, qazirgi ýaqytta jasóspirimderdiń júktiligi boıynsha jaǵdaı jaqsarǵan, alaıda másele áli de bar. 

«Osy baǵytta qandaı jumys atqarylyp jatyr?. Árıne, medıtsına qyzmetkerlerin oqytý arqyly qyzmet kórsetý sapasy artpaq. Biz Densaýlyq saqtaý mınıstrligimen óte tyǵyz jumys isteımiz, kóp jyldar boıy BUU qorynyń halyq salasyndaǵy seriktesimiz. Bul bizge zamanaýı halyqaralyq usynystardy, otbasyn josparlaý, aldyn ala daıyndyq, júkti áıelderge kómek kórsetý tásilderin engizýge kómektesedi. Bul kásibı mamandardyń, muǵalimderdiń qatysýynsyz qıyn bolatyny belgili. Sondyqtan úshinshi jyl qatarynan pedagogter, densaýlyq saqtaý salasynyń ókilderine arnalǵan pikirtalas alańy bolyp tabylatyn «jasóspirimder men jastardyń reprodýktıvti densaýlyǵy» konferentsııasyn uıymdastyryp kelemiz», — dedi spıker.

Halyqaralyq sarapshylar jynystyq debıýttiń jasy ózgergenin (qazir 16,5 jasta), biraq jasóspirimderdiń reprodýktıvti minez-qulqy ózgermegenin atap ótti.

«44%-dan astamynyń jynystyq qatynasta birneshe seriktesi bar. Bul qaýipti. Bizdiń mindetimiz — habardar etý. Qazir jasóspirimder óte qıyn jaǵdaıda, óıtkeni ınternet bar, onda aqparat kóp, olar keıde burys, burmalanyp beriledi. Bizdiń mindetimiz — jastarǵa kómektesý», — dedi Galına Grebennıkova.

Eske sala keteıik, buǵan deıin Túrkistan oblysynda 182 jasóspirim júkti bolyp qalǵanyn jazǵan bolatynbyz. Al, SQO-da byltyr 46 jasóspirim qyz bosansa, 14-i jasandy túsik jasatqan.